कामना सेवाको फुटसल आज र भोलि

काठमाडौँ। कामना सेवा विकास बैंकले फुटसल प्रतियोगिता गर्दैछ । बैंकको आयोजनामा आज र भोलि प्रतियोगिता गर्ने भएको हो । ‘स्वस्थ्य शरीर स्वस्थ्य मस्तिष्क’ भन्ने मर्मलाई आत्मसात् गरी बैंकले सो प्रतियोगिता गर्न लागेको हाे ।

केन्द्रीय कार्यालयमा आयोजित कार्यक्रममा ‘कामना सेवा फुटसल २०२१’ प्रतियोगिताका सहभागी टिमहरूको घोषणा गर्नुका साथै खेल तालिकाबारे जानकारी गराइएको थियाे । फुटसल प्रतियोगितामा विभिन्न बैंक तथा वित्तीय संस्था र बिमा कम्पनीहरू समेत गरी २४ वटा टिम सहभागी हुने बैंकका इन्चार्ज प्रसन्न श्रेष्ठले जानकारी दिए ।

खेलको लागि गोला प्रक्रियाद्वारा समूह विभाजन गरिएको छ । बैंकका अध्यक्ष सुदिप आचार्यको अध्यक्षतामा सम्पन्न उक्त कार्यक्रममा बैंकका सञ्चालक विश्वेश्वर सुवेदी र सिता घिमिरे, निमित्त प्रमुख कार्यकारी अधिकृत हरि प्रसाद लम्साल, सञ्चारकर्मी, एन्फा फुटबल कमिटीका प्रतिनिधि, खेलमा सहभागी संस्थाहरूका प्रतिनिधिहरू तथा बैंकका कर्मचारीहरूको उपस्थिति रहेको थियो ।

सोही कार्यक्रममा एन्फा फुटबल कमिटीले खेलका नियमहरूको बारेमा जानकारी गराएको थियो । उक्त प्रतियोगितामा एन्फा फुटबल कमिटीले रेफ्रिहरु उपलब्ध गराउनुका साथै खेल सम्पन्न गर्नको लागि सहजीकरण समेत गर्नेछ । युवा तथा खेलकुद मन्त्री माननीय महेश्वर जङ्ग गहतराजबाट आज उक्त खेलको समुद्घाटन हुनेछ भने पौष १० गते अखिल नेपाल फुटबल संघका अध्यक्ष कर्मा छिरिङ शेर्पाबाट खेलको समापन गरिने बैंकले जनाएको छ ।

भोलि गते हुने नकआउट चरणका खेलहरूको विभिन्न डिजिटल माध्यमबाट प्रत्यक्ष प्रसारण गरिनेछ । यस प्रतियोगिताले संस्थाको साख बढाउन दिनरात खटिने बैंक तथा बिमा क्षेत्रका कर्मचारीहरूको स्वास्थ्य तथा निरोगिता प्रवर्द्धन गर्ने तथा संस्थाहरू बिच मैत्रीपूर्ण सम्बन्ध स्थापित र खेल मैत्री वातावरण निर्माण हुने कुरामा आफू पूर्ण विश्वस्त रहेको बैंकका अध्यक्ष सुदीप आचार्यले बताए ।