एसियन सेन्ट्रल जोन भलिबल: नेपाल श्रीलंकासँग पराजित

एसियन सिनियर सेन्ट्रल जोन भलिबल च्याम्पियनसिपमा नेपालको पुरुष टिम श्रीलंकासँग पराजित भएको छ। बंगलादेशमा जारी प्रतियोगिताको आफ्नो तेस्रो खेलमा नेपाली टीम श्रीलंकासँग ३-१ को सेटमा पराजित भएको हो।

बंगलादेशको ढाका मिरपुरस्थित शाहिद शुरवार्दी इन्डोर हलमा भएको खेलमा नेपालले श्रीलंकालाई चुनौती दिएपनि हार टार्न भने सकेन। यसअघि नेपाल पहिलो खेलमा बंगलादेशसँग हार भोगेको थियो भने दोस्रो खेलमा उज्वेकिस्तानलाई पराजित गरेको थियो।

श्रीलंका विरुद्ध पहिलो सेटमा सुरुवाती अग्रताका बाबजुत नेपाल सर्भिस र रिसिभमा चुक्दा २५-१८ ले पराजित भयो। यद्धपि दोस्रो सेट नेपाल खेलमा फर्किदै २५-२२ ले आफ्नो पक्षमा पार्यो। तेस्रो सेटमा पुनः श्रीलंकाले खेल २५-१४ को सेटमा जित निकाल्यो। श्रीलंकाले चौंथो सेटलाई निर्णायक बनाउने क्रममा खेल २५-१५ ले आफ्नो पक्षमा पार्दै खेलमा ३-१ को जित हात पार्याे ।