कांग्रेसले घरघर जाऔँ, कांग्रेस जिताऔँ अभियान चलाउने

काठमाडाैँ । नेपाली कांग्रेसले घरघर जाऔँ, कांग्रेस जिताऔँ अभियान चलाउने भएकाे छ । मंगलबार पार्टी कार्यालयमा सम्पन्न कांग्रेस केन्द्रीय कार्यसम्पादन समितिको बैठकले पार्टीका सबै संरचनालाई स्थानीय निर्वाचनमा केन्द्रित गर्ने निर्णय गर्दै घरघर जाऔँ कांग्रेस जिताऔँ अभियान घोषणा गरेको हाे ।

कांग्रेस प्रवक्ता डा. प्रकाश शरण महतले आगामी फागुन २० देखि चैत २० गतेसम्म देशैभरी सो अभियान सञ्चालन हुने जानकारी दिए ।

त्यस्तै, बैठकले स्थानीय निर्वाचनको घोषणापत्र लेख्ने लगायतका आवश्यक समिति परामर्शमा गठन गर्ने अधिकार सभापति शेरबहादुर देउवा दिने निर्णय गरेकाे छ ।

प्रवक्ता महतले एमसीसीबारे गलत प्रचार भएको भन्दै अहिले विरोध गर्नेहरू नै त्यसको सम्झौता प्रक्रियामा सहभागी रहेको समेत बताए ।  उनले नेपालले एमसीसीबारे लिने निर्णयले अन्य दातृ संस्थाबाट आउने सहयोगसमेत प्रभावित हुने भन्दै बाहिर प्रचार भएजस्तो एमसीसी परियोजना आउँदैमा अमेरिकाले सेना पठाउने कुरा भ्रममात्रै भएको धारणा राखे ।