बैतडीमा टिपर दुर्घटना ३ जनाकाे मृत्यु, ५ घाइते

धनगढी । बैतडीकाे पाटन नगरपालिका–३ को मानिकाखान–बोहोरीगाउँमा टिपर दुर्घटना हुँदा तीन जनाको मृत्यु भएको छ ।

बोहोरीगाउँ कच्ची सडक खण्डमा सोमवार बा ३ ख ४८७९ नम्बरको टिपर दुर्घटना हुँदा तीन जनाको घटनास्थलमै मृत्यु भएको जिल्ला प्रहरी कार्यालय बैतडीले जनाएकाे छ ।

मृत्यु हुनेमा टिपरधनी ४५ वर्षका जनकराज पन्त, स्थानीय सिगास माध्यमिक विद्यालयमा पढ्ने विद्यार्थी १७ वर्षका ललित अवस्थी र १३ वर्षका ज्ञानु विष्ट रहेका जिल्ला प्रहरी कार्यालय बैतडीका प्रहरी निरीक्षक दर्शन खड्काले जानकारी दिए ।

प्रहरीकाअनुसार विद्यालयबाट फर्किँदा टिपर चढेका विद्यार्थीहरू दुर्घटनामा परेका हुन् । दुर्घटनामा अन्य ५ जना घाइते भएका छन् । घाइते हुनेहरूमा १२ वर्षीय राजेश पन्त, १२ वर्षकै सुनिल भट्ट, १२ वर्षकै अमित बिष्ट र १३ वर्षीय सुदिप पन्त रहेका छन् । घाइते अर्का एकजनाकाे परिचल खुल्न सकेकाे छैन । घाइतेहरूलाई अस्पताल लगिएकाे प्रहरीले जनाएकाे छ ।