निबन्धहरूको अनुवाद आकाशमुखी बजारमा

काठमाडाैँ । लेखक पत्रकार तथा अनुवादक मोहन मैनालीद्वारा अनूदित निबन्धहरूको संग्रह ‘आकाशमुखी’ लोकार्पण भएको छ ।

शनिवार नेपाल प्रज्ञा-प्रतिष्ठानमा आयोजित समारोहमा अध्येताद्वय हरि शर्मा र सगुना शाहका साथमा मोहन मैनालीले पुस्तकको लोकार्पण गरेका हुन् ।

पुस्तकको टिप्पणी गर्दै शर्माले आकाशमुखीमा रहेका निबन्ध र तिनको अनुवाद, अनुवाद भन्दा पनि मौलिक पुस्तक जस्तै लाग्ने भन्दै छानिएका निबन्धले पश्चिमा समाजको जीवन र समाज परिवर्तन कथा बुनिरहँदा तिनले हामीलाई सफलताका निम्ति अनन्त यात्राको प्रेरणा दिने बताए । शर्माले यो पुस्तक आफ्ना सन्तानलाई पढ्न सबैले सिफारिस गर्नु पर्ने बताउँदै उनले भने, ‘म चाहन्छु, यस्तो किताब त विद्यालयको कोर्समा होस् ।’

पुस्तकमाथि टिप्पणी गर्दै सगुना शाहले नारी शिक्षा, समानता, स्वतन्त्रताका लागि पश्चिमा समाजले कसरी संघर्ष गरेको थियो र हाम्रो समाजको सबै वर्गको चेतनाका निम्ति यो पुस्तक प्रेरक हुन सक्ने विश्वास व्यक्त गरिन् । पुस्तक नेपाली पाठकका लागि पठनीय हुने विश्वास उनीहरूले व्यक्त गरे ।

पुस्तकका निबन्ध छनौट र अनुवादबारे मैनालीले यो कोरोनाकालको उपज भएको भन्दै निबन्ध पढ्न चाहने पाठकका लागि उपयोगी हुने ठानेर अनुबाद गर्ने जाँगर चलाएको बताए ।

मैनालीले यसअघि उपल्लो थलो, मान्ठा डराएको जुग, देखेको देशलगायत पुस्तक लेखेका छन् । अनुवाद गरिएको कृति भने यो उनको पहिलो हो ।

बुकहिलले प्रकाशन गरेको १६० पृष्ठको पेपरब्याक संस्करणको मूल्य ३३३ रुपैयाँ राखिएको छ ।