महिलालाई अनैतिक काममा लगाएको आरोपमा ३ जना पक्राउ

पोखरा । महिलाहरूलाई अनैतिक कृत्यमा संलग्न गराइएको आरोपमा पोखराबाट ३ जना पक्राउ परेका छन् । पोखरा ६ लेकसाइडमा कोठा भाडामा लिएर होटलमा महिलालाई सप्लाई गरेको आरोपमा उनीहरू पक्राउ परेका हुन् ।

पक्राउ पर्नेमा पोखरा १७ का नारायण पोखरेल, पोखरा ६ जरेबरका २२ वर्षीया पूजा थापा र बाँके घर भई पोखरा ६ जरेबर बस्ने २२ वर्षका विशाल योगी छन् ।

उनीहरूले फोन सम्पर्कको आधारमा होटलमा महिलाहरूलाई पठाउने र यौन कार्यक्रम संलग्न गराउने गरेको आरोप छ । पक्राउ परेकाहरूलाई मानव बेच–बिखन तथा ओसार पसार मुद्दामा कास्की जिल्ला अदालतबाट ८ दिन म्याद थप गरी अनुसन्धान अघि बढाइएको कास्की प्रहरीका प्रवक्ता डीएसपी सुन्दर तिवारीले जानकारी दिए ।