भरुवा बन्दुकको पासोमा परेर एक जनाको मृत्यु

धनगढी । डडेल्धुरामा भरुवा बन्दुकको गोली लागेर एक जनाको मृत्यु भएको छ । जिल्लाको गन्यापधुरा गाउँपालिका-५ स्थित पटौरा सामुदायिक वनमा जंगली जनावर मार्नका लागि थापिएको भरुवा बन्दुकको पासोमा पर्दा सोही गाउँपालिकाको वडा नम्बर ४ का ४५ वर्षीय दलबहादुर पानको मृत्यु भएको हो ।

गोली लागेर घाइते भएका पानलाई डडेल्धुरा अस्पताल लैजाँदै गर्दा बाटोमा नै मृत्यु भएको जिल्ला प्रहरी कार्यालय डडेल्धुराका प्रहरी नायव उपरीक्षक देवेन्द्रबहादुर पालले बताए । उनको शव अस्पतालमै राखिएको छ ।

पासो कसले थापेको हो भन्नेबारे अनुसन्धान भइरहेको प्रहरी नायव उपरीक्षक पालले बताए । उनका अनुसार घटनामा संलग्न रहेको आशंकामा ४ जनालाई नियन्त्रणमा लिई आवश्यक अनुसन्धान अगाडि बढाइएको छ । प्रहरीले उनीहरूको परिचय भने खुलाएको छैन ।