म्यानचेस्टर सिटी र लिभरपुल सेमिफाइनलमा

काठमाडौँ । प्रिमियर लिग क्लब म्यानचेस्टर सिटीसँगै लिभरपुल र क्रिस्टल प्यालेस एफए कपको सेमिफाइनलमा प्रवेश गरेका छन् ।

प्रिमियर लिगको शीर्षस्थानमा रहेको म्यानचेस्टर सिटीले प्रिमियर लिगकै टोली साउथह्याम्टनमाथि उसकै मैदानमा ४-१ को सानदार जित निकाल्दै अन्तिम चारमा स्थान पक्का गरेको हो । सिटीको फराकिलो जितमा रहिम स्टर्लिङ, केभिन डि ब्रुएन, फिल फोडेन र रियाद महारेजले गोल गरे । साउथह्याम्टनले एक गोल उपहार पाएको थियो ।

अर्को खेलमा लिभरपुले च्याम्पियनसिप क्लब नथिङघम फरेस्टलाई १-० ले पराजित गर्दै सेमिफाइनलमा प्रवेश गरेको छ । लिभरपुलको जितमा खेलको ७८औँ मिनेटमा डिओगो जोटाले गरेको गोल नै खेलको निर्णायक गोल बनेको थियो ।

यस्तै क्रिस्टल प्यालेसले एभर्टनलाई ४-० ले पराजित गरेको छ । क्रिस्टल प्यालेसको जितमा मार्क गुही, जिन फिलिप माटेटा, वेलफ्रेड जाहा र विल ह्युगले गोल गरे ।

योसँगै एफए कपको यस वर्षको सेमिफाइनलको समीकरण पूरा भएको छ । लिभरपुलसहित म्यानचेस्टर सिटी, क्रिस्टल प्यालेस र चेल्सी एफए कपको सेमिफाइनलमा पुगेका छन् । अब सेमिफाइनलमा लिभरपुलसँग म्यानचेस्टर सिटी तथा क्रिस्टल प्यालेससँग चेल्सी खेल्नेछन् ।