गाईसँग मोटरसाइकल ठोक्किँदा चालकको मृत्यु

धनगढी । कैलालीमा मोटरसाइकल दुर्घटना हुँदा एक जनाको मृत्यु भएको छ ।

जिल्लाको गौरीगंगा नगरपालिका-८ मा पूर्वबाट पश्चिमतर्फ गइरहेको से १ प ७७६५ नम्बरको मोटरसाइकल सडकमा छाडा गाईसँग ठोक्किएर दुर्घटना हुँदा गौरीगंगा-७ का ३५ वर्षीय दिलबहादुर ताडीको मृत्यु भएको हो ।

दुर्घटनामा गम्भीर घाइते भएका उनको धनगढीस्थित सेती प्रादेशिक अस्पतालमा उपचारका क्रममा मृत्यु भएको जिल्ला प्रहरी कार्यालय कैलालीले जनाएको छ ।

कैलालीमा छाडा चौपायाले गर्दा सडकमा दुर्घटना हुने गरेको छ । स्थानीय तहहरूले छाडा चौपाया व्यवस्थापनको प्रयास गरेपनि सफल हुन सकेनन् ।