१ लाख १ हजार पुरस्कार राशीको मेयरकप फुटबल शुरू
काठमाडाैँ । गोकर्णेश्वर नगरपालिका, युवा तथा खेलकुद समितिको आयोजनामा आजबाट १ लाख १ हजार पुरस्कार राशी भएको प्रथम मेयरकप रनिङ शिल्ड फुटबल प्रतियोगिता सुरु भएको छ ।
कागेश्वरी मनोहाराको मूलपानीमा अवस्थित सशस्त्र प्रहरी बलको मैदानमा आज एक समारोह बिच युवा तथा खेलकुद समिति का संयोजक संजय लामाले खेलको उद्घाटन गरेका हुन् ।
नकआउटको आधारमा खेलाइने खेलमा गोकर्णेश्वर नगरपालिका भित्रका ८ वटा टिमले भाग लिएका छन् ।
प्रतियोगितामा प्रथम हुने टिमले १ लाख १ हजार नगद सहित रनिङ शिल्ड, ट्रफी, मेडल र प्रमाणपत्र अनि द्वितीय हुने टिमले ५१ हजार नगद सहित ट्रफी, मेडल र प्रमाणपत्र पाउनेछन् ।
आज भएको उद्घाटन खेलमा गोकर्णेश्वर वडा नम्बर १ ले वडा नम्बर २ लाई टाइब्रेकरमा ४-३ गोल अन्तरले पराजित गरी सेमिफाइनलको यात्रा तय गरेको छ । निर्धारित ९० मिनेट र थप गरिएको अतिरिक्त समयमा पनि दुबै टिमबाट गोल नभएपछि खेलको निर्णय टाइब्रेकरबाट गरिएको थियो ।
आजको अर्को खेल वडा नम्बर ३ र वडा नम्बर ७ बिच दिउँसो ३ बजे हुनेछ ।
