नुवाकोटमा ४६४ पदका लागि दुई हजार उम्मेदवार

काठमाडौँ । स्थानीय तह निर्वाचन २०७९ को लागि नुवाकोटमा दुई हजार ८९ जनाले उम्मेदवारी दर्ता गराएका छन्।

जिल्लाका १२ पालिकासहित ८८ वडाको ४६४ पदमा दुई हजार ८९ जनाले उम्मेदवारी दर्ता गराएको निर्वाचन कार्यालय नुवाकोटले जनाएको छ। कार्यालयका अनुसार विदुर नगरपालिकामा ६७ पदका लागि २७६, बेलकोटगढी नगरपालिकामा ६७ पदका लागि ३२१, दुप्चेश्वर गाउँपालिकामा ३७ पदका लागि १४३, पञ्चकन्या गाँउपालिकामा २७ पदका लागि १३१, तादी गाउँपालिकामा ३२ पदका लागि १६० जनाले उम्मेदवारी दिएका छन्।

सूर्यगढी गाउँपालिकामा २७ पदका लागि १२१, ककनी गाउँपालिकामा ४२ पदका लागि २१४, शिवपुरी गाउँपालिकामा ४२ पदका लागि १७२, तारकेश्वर गाउँपालिकामा ३२ पदका लागि १२५, म्यागङ गाउँपालिकामा ३२ पदका लागि १३५, किस्पाङ गाउँपालिकामा २७ पदका लागि १११, लिखु गाउँपालिकामा ३२ पदका लागि १६२ जनाले उम्मेदवारी दिएको निर्वाचन अधिकारी जयप्रसाद गौतमले जानकारी दिए।

उनका अनुसार विदुर नगरपालिकाको प्रमुखमा विभिन्न पार्टी र स्वतन्त्र गरेर ११ जनाको उम्मेदवारी परेको छ भने उपप्रमुख पदमा १० जनाको उम्मेदवारी परेको छ। विदुर नगरपालिकाको १३ वटा वडामा ६२ जनाको उम्मेदवारी परेको छ। त्यस्तै, बेलकोटगढी नगरपालिकामा नगरप्रमुखमा नौजनाको उम्मेदवारी परेको छ भने उपप्रमुखमा पाँचजनाको उम्मेदवारी परेको छ। १३ जना वडाध्यक्ष पदमा ७५ जनाको उम्मेदवारी दर्ता भएको निर्वाचन अधिकृतको कार्यालयले जनाएको छ।

दुप्चेश्वर गाउँपालिकामा अध्यक्ष पदमा सात, उपाध्यक्षमा पाँच र सातवटा वडाबाट वडाध्यक्ष पदमा ३४ जनाको उम्मेदवारी परेको छ । पञ्चकन्या गाउँपालिकामा अध्यक्षमा सात, उपाध्यक्षमा ६ र पाँचवटा वडाको वडाध्यक्ष पदमा ३१ जनाको उम्मेदवारी परेको छ। तादी गाउँपालिकामा अध्यक्षमा नौ, उपाध्यक्षमा पाँच र ६ वटा वडाबाट वडाध्यक्ष पदमा १४, सूर्यगढी गाउँपालिकामा अध्यक्षमा ६, उपाध्यक्षमा पाँच र पाँचवटा वडाको वडाध्यक्ष पदमा २७ जनाको उम्मेदवारी परेको निर्वाचन कार्यालयले जनाएको छ।

ककनी गाउँपालिकामा अध्यक्षमा नौ, उपाध्यक्षमा सात र आठवटा वडाको वडाध्यक्ष पदमा ५० जनाको उम्मेदवारी परेको छ। जिल्लाको शिवपुरी गाउँपालिकामा अध्यक्ष पदमा ६, उपाध्यक्षमा चार र आठवटा वडाको वडाध्यक्षमा ३६ जनाको उम्मेदवारी परेको छ। तारकेश्वर गाउँपालिकामा अध्यक्ष पदमा ६, उपाध्यक्षमा पाँच र ६ वटा वडाबाट वडाध्यक्ष पदमा ३१ जनाको उम्मेदवारी दर्ता भएको छ।

जिल्लाको म्यागङ गाउँपालिकामा अध्यक्ष र उपाध्यक्षमा सात–सात र ६ वटा वडाबाट वडाध्यक्ष पदमा ३३ जनाको उम्मेदवारी परेको छ। यस्तै, किस्पाङ गाउँपालिकाको अध्यक्ष पदमा सात, उपाध्यक्षमा पाचँ र पाँचवटा वडाबाट वडाध्यक्ष पदमा २७ जनाको उम्मेदवारी परेको छ। लिखु गाउँपालिकामा अध्यक्षमा सात, उपाध्यक्षमा ६ र ६ वटा वडाबाट वडाध्यक्ष पदमा ३३ जनाको उम्मेदवारी दर्ता भएको निर्वाचन कार्यालय नुवाकोटले जनाएको छ।

नुवाकोटको दुई नगरपालिका र दसवटा गाउँपालिकाको विभिन्न ८८ वटा वडामा दुई–दुई पद रहेको खुला सदस्यका १७६ पदमा ७७१, ८८ वटा वडामा एक–एकजना हुने महिला सदस्य पदमा ३७३ र ८८ वटा वडामा एक–एकजना हुने दलित महिला सदस्य पदमा ३११ जनाको उम्मेदवारी दर्ता भएको छ।

उम्मेदवारहरूको यो प्रारम्भिक नामावली भएकाले दाबी विरोधको कारबाही र उम्मेदवार स्वयंले नाम फिर्ता लिने समयसीमा अझै बाँकी रहेकाले अन्तिम नामावलीमा यो सङ्ख्या केही घट्नसक्ने निर्वाचन कार्यालयले जनाएको छ।