दोलखाको गौरीशङ्करमा जोडियो राष्ट्रिय प्रसारण लाइनः च्छोरोल्पाको पर्यटनमा टेवा
![](https://www.makalukhabar.com/wp-content/uploads/2023/10/Final-icon-Logo-2023.png)
![दोलखाको गौरीशङ्करमा जोडियो राष्ट्रिय प्रसारण लाइनः च्छोरोल्पाको पर्यटनमा टेवा](https://www.makalukhabar.com/wp-content/uploads/2022/06/electricity-line-makalukhabar.png)
काठमाडौँ । दोलखाको विकट उत्तरी क्षेत्र गौरीशङ्कर हिमालको काखैमा रहेको गौरीशङ्कर गाउँपालिका–९ को विभिन्न गाउँमा राष्ट्रिय प्रसारण लाइनको विद्युत् जडान भएको छ ।
गौरीशङ्कर–९ को पर्यटकीय विभिन्न गाउँहरूमा सोलार बत्ती जडान गरिएका थिए । गौरीशङ्कर गाउँपालिका र नेपाल विद्युत् प्राधिकरणको संयुक्त प्रयासमा गौरिशङ्करको च्छोरोल्पा हिमतालको बेस क्याम्प सुर्मुचे, क्याल्चे, डोङाङ्ग र बेदिङ्ग लगायतको क्षेत्रहरूमा विद्युतलाई विस्तार गरिएको हो ।
स्थानीयवासीले विद्युत् सेवाका लागि संरचना निर्माणमा समेत आवश्यक सहयोगसमेत गरेपछि गाउँमा बिजुली बत्ती आएको स्थानीय शिक्षक बोलेन्द्र आचार्यले जानकारी दिए । जिल्लाकै उत्तरी क्षेत्र र हिमाली उच्च क्षेत्र भएका कारण तथा यातायातको सुविधा नभएपश्चात् प्रसारण लाइन जडानका लागि निकै चुनौती रहेको र लामो समयदेखि निरन्तर कार्य जारी रहेपश्चात् गाउँमा बिजुली पुगेको जनाइएको छ । अहिले सो क्षेत्रका स्थानीयवासी हर्षित भएका छन् ।
गौरीशङ्कर–९ स्थित सुर्मुचे, क्याल्चे, डोङाङ्ग र बेदिङ्ग लगायतका बस्तीहरूमा राष्ट्रिय केन्द्रीय प्रसारण लाइनको बिजुली बल्न सुरु भएपछि च्छोरोल्पा जाने पर्यटकहरूका लागि सबैभन्दा बढी सहज भएको छ । एक हप्तासम्मको यात्रामा च्छोरोल्पा जाने पर्यटकलाई मोबाइल, टर्च र क्यामेराको ब्याट्री लगायतका विद्युतीय उपकरणहरू चार्जका लागि बिजुली चाहिने भए तापनि विद्युत् नहुँदा समस्या हुँदै आएको अब उक्त समस्याको समाधान भएको छ ।
वर्षमा हजारौं पर्याटकहरू पैदल मार्ग हुँदै हप्तादिनको यात्रामा च्छोरोल्पा जाने गर्दछन् । बाटोमा खान-बस्नको राम्रो व्यवस्थापन र पैदल मार्गका लागि च्छोतदेखि हिमतालसम्मै पुग्ने बाटो राम्रो तरिकाले निर्माण गरेपछि पर्यटकहरू थप वृद्धि भएको स्थानीयवासी छिरिङ शेर्पाले बताए । बाटोमा बस्दै रमाइलो गर्दै जाने पर्यटकहरूका लागि विद्युत् सेवा विस्तार भएपछि थप सहयोग पुग्ने स्थानीयवासीको अपेक्षा रहेको छ ।
च्छोरोल्पा हिमतालमा पैदल यात्रामार्फत् जान नसक्ने कतिपय पर्यटकहरू हेलीमार्फत् पनि उक्त क्षेत्रमा भ्रमणमा जाने गरेको पाइन्छ । गौरीशङ्कर संरक्षण क्षेत्रभित्र पर्ने यस हिमतालमा जाने पर्यटकहरूलाई सहज गराउनका लागि संरक्षण क्षेत्रले समेत विभिन्न कार्यक्रमहरू सञ्चालन गर्दै आइरहेको छ । गौरीशङ्कर गाउँपालिका–९ का ठाङ्दिङ्ग, उतिसे र केताङ्गमा अझै विद्युतीकरणको कार्य बाँकी रहेको छ ।
![](https://www.makalukhabar.com/wp-content/uploads/2023/10/Final-icon-Logo-2023.png)