सिकागोमा गोली प्रहार गरी हप्तान्तमा पाँचको मृत्यु, १६ घाइते
वासिङटन । अमेरिकामा पछिल्लो समय लगातार एकपछि अर्को गोली प्रहारको घटना भएका छन् । ती मध्ये सिकागोमा मात्रै पछिल्लो हप्तान्तमा भएका घटनामा परी कम्तीमा पाँच जनाको मृत्यु भएको छ भने अरु १६ जना घाइते भएका छन् ।
अमेरिकाभरि सुरक्षाका नाममा व्यक्ति व्यक्तिलाई बन्दुक राख्न अनुमति दिने की नदिने बहस चलिरहेका बेला घटना पनि बढी रहेका छन् । पछिल्लो समय गोली प्रहारका घटनामा परी धेरैको मृत्यु भएको छ भने दर्जनौँ घाइते भएका छन् ।
पछिल्लो पटक शनिबार दिउसो १२।१९ बजे साउथ अल्वानीमा भएको घटनामा परी ३७ बर्षिय एक महिलाको हत्या भएको छ ।
यात्रा गरिरहेकी ती महिलालाई अपरिचित व्यक्तिले विना कारण गोली प्रहार गरेर हत्या गरेको प्रहरीले जनाएको छ । प्रहरी अधिकारीहरूले घटनाका बारेमा अनुसन्धन भइरहेको जनाएका छन् ।
यही हप्तान्तमा सिकागोकै अन्य ठाउँहरूमा पनि गोली प्रहारका अन्य घटनाहरू समेत भएको प्रहरी कार्यालयले जनाएको छ ।
