घरमा आगलागी : श्रीमतीको मृत्यु, श्रीमान् पक्राउ

विराटनगर । मोरङको रंगेली नगरपालिका १ स्थित बिर्ता बजारमा रहेको तिल्का मल्लिकको घरमा आगलागी हुँदा एक महिलाको मृत्यु भएको छ । आगलागीमा परी तिल्काको श्रीमती ३० वर्षीया बबिता मण्डलको मृत्यु भएको हो ।

शुक्रबार १० बजे घरमा आगलागी भएको थियो । पत्नीलाई घरभित्र थुनेर आगो लगाएको आशंकामा प्रहरीले २३ वर्षीय मृतकका श्रीमान् तिल्का मल्लिकलाई पक्राउ गरेको छ । प्रारम्भिक अनुसन्धानमा उनकै श्रीमानले घरमा थुनेर आगो लगाएको हुनसक्ने देखिएको इलाका प्रहरी कार्यालय रंगेलीका प्रहरी निरीक्षक शैलेश न्यौपानेले जानकारी दिए । उनकाअनुसार तिल्कालाई पक्राउ गरेर घटनाको अनुसन्धान शुरु गरिएको छ ।

गम्भीर घाइते भएकी मण्डलको उपचारका क्रममा कोशी अस्पतालमा बिहान मृत्यु भएको थियो । श्रीमान् श्रीमतीबीच आन्तरिक विवादबाट घटना भएको हुनसक्ने देखिएको प्रहरीको आशंका रहेको छ । दाजु जगदीश मल्लिकको मृत्यु भएपछि तिल्काले ५ वर्षअघि बबितालाई विवाह गरेका थिए ।