भारतीय नागरिकको हत्या आरोपमा तीनजना पक्राउ

विराटनगर । झापामा एक व्यक्तिको हत्या गरेको आरोपमा तीन जनालाई प्रहरीले पक्राउ गरेको छ । प्रहरीले भारतको अहमदावाद गुजरातका ४० बर्षीय जपडिया नरेशकुमार बाबु भाइकाे हत्या गरेको आरोपमा ३ जना पक्राउ परेका हुन्  ।

झापाको अर्जुनधारा नगरपालिका-४ सहासी टोल स्थित कच्ची सडक खण्डको ह्युम पाइपभित्र बोरामा फेला परेको शवको पहिचान भएसँगै हत्यामा संलग्न रहेको आरोपमा तीन जनालाई पक्राउ गरिएको जिल्ला प्रहरी कार्यालय झापाले जनाएको छ ।

पक्राउ पर्नेमा झापा अर्जुनधारा-७ कि ३२ वर्षीया जानुका सुबेदी थापा, उनका श्रीमान् ४९ बर्षीय  बिर्ख बहादुर थापा र सुनसरी बराहक्षेत्र-१० का २५ बर्षीय सुरेश परियार रहेका छन् ।

असार १२ गते ह्युम पाइप भित्र सेतो बोरामा करिब ४० बर्षीय पुरुष मानिसको शव दुर्गन्धित अवस्थामा फेला परेसँगै घटना स्थलमा खटिएको प्रहरी टोलीले मृतकको साथमा फेला परेको भारतीय आधार कार्डको आधारमा अनुसन्धान थालेको जनाएको छ ।

अनुसन्धानको क्रममा भारत अहमदावाद गुजरातका ४० बर्षीय जपडिया नरेश कुमार बाबु भाइ रहेको भन्ने खुल्न आएसँगै हत्यामा संलग्न रहेको आरोपमा  तीनै जनालाई  इलाका प्रहरी कार्यालय अनामनीले  पक्राउ गरेको हो ।