मोबाइल चोरेको आरोप लागेको प्यारे ८० राउन्ड गोली सहित पक्राउ

विराटनगर । झापाबाट प्रहरीले ८० राउन्ड गोली सहित एक जनालाई पक्राउ गरेको छ । भद्रपुर नगरपालिका–५ का १८ वर्षीय मोहम्मद प्यारेलाई प्रहरीले पक्राउ गरेको हो ।

मोबाइल चोरीको आरोपमा पक्राउ परेका उनको साथबाट पेस्तोलमा लाग्ने ८० राउन्ड गोली समेत बरामद भएको प्रदेश प्रहरी कार्यालय विराटनगरले जनाएको छ ।

असार २४ गते राती पुरानो भद्रपुरमा राजु अग्रवालले सञ्चालन गर्दै आएको प्रियङ्का मोबाइल पसलबाट विभिन्न कम्पनीका मोबाइल २९ थान, घडी २ थान र नगद ६१ हजार ५ सय चोरी गरेको प्रहरीले जनाएको छ ।

सबै सामान गरी ५ लाख अठार हजार दुई सय मूल्य बराबरको चोरी भनी जानकारी पाए लगत्तै चोरीमा संलग्न व्यक्तिको खोजतलासमा खटिएको प्रहरी टोलीले प्यारेलाई २८ गते राती पक्राउ गरेको हो ।

पक्राउ परेका व्यक्तिलाई सोधपुछ र अनुसन्धान गर्ने क्रममा चोरी भएका मध्ये १ थान मोबाइल, मोबाइलको चार्जर २७ थान र प्यारेको घरबाट ८० राउन्ड पेस्तोलको गोली बरामद भएको प्रदेश प्रहरी कार्यालय विराटनगरका प्रवक्ता एसपी नवीन राईले जानकारी दिए ।

प्यारेको साथबाट प्रहरीले सटर फुटाउन प्रयोग गरेको रड र पसलमा लगाएको तोडिएको ताला समेत बरामद भएको जनाएको छ । घटना सम्बन्धमा अन्य थप अनुसन्धान भइरहेको प्रहरीले जनाएको छ ।