कर्णालीमा हाम फाल्छु भन्दै श्रीमतीलाई फोन गरेर सोनाम बेपत्ता

सुर्खेत । मुगुका एक पुरुषले श्रीमतीलाई फोन गरेर कर्णालीमा हाम फाल्छु भनेर बेपत्ता भएका छन् । बेपत्ता हुनेमा मुगमकार्मारोङ गाउँपालिका–८ माङ्ग्रीका २७ वर्षीय सोनाम तामाङ रहेका छन् ।

सक्ली भन्ने स्थानमा आफ्नै गोठमा बस्ने गरेका उनले मंगलबार बेलुकातिर घरमा श्रीमतीलाई फोन गरी म कर्णाली नदीमा हाम फाल्छु भनेका थिए ।

प्रदेश प्रहरी कार्यालयका सूचना अधिकारी हिराबहादुर पाण्डेले श्रीमतीलाई फोन गरिसकेपछि मोबाइल अफ गरेर बेपत्ता भएको जानकारी दिए । उनकाअनुसार सोनामले ४५ हजार आफू बस्ने ठाउँमा छोडेर बेपत्ता बनेका छन् ।

यद्यपि परिवारले बुधवार बिहान १० बजे मात्रै खोजविनका लागि प्रहरीलाई खबर गरेको उनले बताए । पाण्डेका अनुसार प्रहरी चौकी छाइललाले उनको खोजी कार्य जारी राखेको छ ।