सप्तकोशीको कटान : उदयपुर र सुनसरीका ६ वडा जोखिममा

विराटनगर । वर्षा सुरु भएसँगै सप्तकोसीमा पानीको सतह बढ्दै जाँदा कटानको जोखिम बढ्दै गएको छ। पानीको बहाव बढ्दै जाँदा सप्तकोसी नदीले निरन्तर पश्चिम तर्फ कटान थालेको छ।

उदयपुरको बेलका नगरपालिकाका ४ वटा वडा र सुनसरीको वराहक्षेत्र नगरपालिकाको श्रीलङ्का टाप्पु जोखिममा परेको छ ।

सप्तकोसी नदीले लगातार दुई वर्षदेखि पश्चिम तर्फ कटान गरिरहेको छ । निरन्तरको कटानका कारण श्रीलङ्का टप्पुको २ हजार ५ सय बिघा खेतीयोग्य जमिन २ वर्षको अवधिमा नदीले बगाइसकेको छ।

नदीको कटानका कारण सुनसरीको वराहक्षेत्र श्रीलङ्का टाप्पुका १ सय बढी परिवार विस्थापित भएका छन् । एउटा विद्यालय पनि नदीले बगाएपछि अन्यत्र सारिएको छ ।

सप्तकोसी नदीले अहिले उदयपुरको बेलका नगरपालिका वडा ८ डुम्री बोटे ९लाहुरे खोज० मा तीव्र कटान सुरु गरेको छ । नदीले दैनिक १० मिटर सम्म कटान गरिरहेको बेलका नगरपालिका वडा नम्बर ८ का वडाध्यक्ष जयकुमार राईले बताए । डुम्रीबोटे लाहुरे खोचमा नदीले एक सय मिटर कटान गरेको जयकुमार राई बताउँछन् ।

सो स्थानमा भइरहेको नदी कटान रोक्न नसकिए बेलका नगरपालिकाको वडा नम्बर ८, ९, ३ र २ नम्बर वडा जोखिममा पर्ने राईले बताए ।

डुम्री बोटेमा कोसी कटान सुरु भएपछि उदयपुरको बेलका, चौदण्डी, सप्तरीको सप्तकोसी, कञ्चनरूप लगायत सुनसरीको वराहक्षेत्र नगरपालिका वडा नं ६ र ९ मा पर्ने श्रीलङ्का टप्पु समेत जोखिममा परेको राईले बताए ।

कटान नियन्त्रणका लागि बोरामा बालुवा हालेर बाँध बनाउने काम भइरहेको छ । तर नदीको कटा भने नरोकिएको स्थानीयले बताएका छन् । २ वर्षदेखि पूर्वी तटबन्धमा बगिरहेको सप्तकोसी पश्चिमतर्फ सर्दै कटान गरिरहेको छ ।