ब्राउन सुगरसहित ६ जना पक्राउ

विराटनगर । विराटनगरमा लागु औषध सहित ६ जनालाई प्रहरीले पक्राउ गरेको छ। विराटनगर महानगरपालिका –१४ बाट प्रतिबन्धित लागुऔषध सहित ६ जनालाई प्रहरीले पक्राउ गरेको हो ।

लागुऔषध बिक्री वितरण भइरहेको भन्ने विशेष सूचनाको आधारमा इलाका प्रहरी कार्यालय रानीबाट खटिएको प्रहरी टोलीले उनीहरूलाई पक्राउ गरेको हो । रामधुनी नगरपालिका–८ घर भई विराटनगर–१४ मुन्डा पोखरीमा डेरा गरी बसेकी २७ वर्षीया सरस्वती गुरुङको कोठाबाट १४ ग्राम ६१ मिलिग्राम ब्राउन सुगर, डिजिटल तराजु बरामद भएको प्रहरीले जनाएको छ।

प्रहरीले सिन्धुपाल्चोक चौताराका २६ वर्षीय विकास थापा, विराटनगर–१५ का २४ वर्षीय वरुण साह, विराटनगर–३ का ३० वर्षीय आशिष हमाल, विराटनगर–१३ का ३० वर्षीय सुलभ रिजाल र धरान–२० का २३ वर्षीय रोशन लिम्बु सहित ६ जना पक्राउ गरेको हो ।

पक्राउ परेका उनीहरूलाई मोरङ जिल्ला अदालतबाट लागुऔषध कसुरमा म्याद थप गरी अनुसन्धान भइरहेको जिल्ला प्रहरी कार्यालय मोरङले जनाएको छ ।