गाडी चोरेर भागेका व्यक्ति दुर्घटनापछि पक्राउ

विराटनगर । टाटा सुमो गाडी चोरेर भाग्दा–भाग्दै एक व्यक्तिलाई प्रहरीले पक्राउ गरेको छ ।  विराटनगर महानगरपालिका पोखरियाको भट्टाचोकबाट टाटा सुमो गोल्ड गाडी लिएर भाग्दै गरेको अवस्थामा दुर्घटना भएपछि ती व्यक्ति पक्राउ परेको प्रहरीले जनाएको छ।

पक्राउ पर्ने व्यक्ति बर्जु गाउँपालिका २ का अरुण चौधरी हुन्। चौधरीले विराटनगर १ को भट्टाचोकबाट को १ च ९४६७ नम्बरको सुमो कुदाएर भाग्दै गरेको अवस्थामा अर्को गाडीलाई ठक्कर दिंदा दुर्घटना भएको प्रहरीको दाबी छ।

सो गाडीले विराटनगर २  शंकरपुर मोडमा स्कुल बसलाई ठक्कर दिएको थियो । स्थानीयको सहयोगमा प्रहरीले गाडी लिएर भाग्दै गरेका चौधरीलाई नियन्त्रणमा लिएको जिल्ला प्रहरी कार्यालय मोरङका डिएसपी दीपक श्रेष्ठले जानकारी दिए।

डिएसपी श्रेष्ठका अनुसार  पार्किङ गरिराखिएको टाटा सुमोको साँचो चालकले ड्यासबोर्ड माथि राखेर घरभित्र गएको अवस्थामा चौधरीले मौका छोपेर लिएर भागेको अनुसन्धानबाट खुलेको छ । घटनामा संलग्न चौधरी नियन्त्रणमा छन् ।