विराटनगरमा किशोरको अपहरणपछि हत्या, तीनजना पक्राउ

विराटनगर । विराटनगर बसपार्क नजिकै रहेको एक गेस्ट हाउसमा एक किशोर मृत अवस्थामा फेला परेका छन् ।

प्रहरीले ती किशोरको हत्या भएको हुनसक्ने आशंका गरेको छ। मृतक भेटिएका व्यक्ति सिरहा जिल्लाको गोलबजार घर भएका १८ वर्षे अंशु सदा रहेका खुलेको जिल्ला प्रहरी कार्यालय मोरङले जनाएको छ ।

विराटनगरको न्यु अप्सरा गेस्ट हाउसको कोठा नम्बर १ मा ती किशोरको शव फेला परेको प्रहरीको भनाइ छ । ती किशोरलाई सिरहाको गोलबजारबाट अपहरण गरेर ल्याई विराटनगरको सो होटेलमा हत्या गरिएकाे प्रारम्भिक अनुसन्धानबाट खुलेको प्रहरीले जनाएको छ।

अपहरणकारीले सदालाई असोज २३ गतेदेखि अपहरण गरेर उक्त गेस्ट हाउसमा राखेर १ लाख फिरौती मागेको खुल्न आएको जिल्ला प्रहरी कार्यालय मोरङका प्रहरी उपरीक्षक शान्तिराज कोइरालाले जानकारी दिए ।

उनको हत्या २७ गते राती नै भएको खुल्न आएको एसपी कोइरालाको भनाई छ।  हत्यामा संलग्न रहेको आरोपमा प्रहरीले ३ जनालाई पक्राउ गरेको छ । घटनाको बारेमा अनुसन्धान भइरहेको एसपी कोइरालाले जानकारी दिए ।