गठबन्धनले चुनाव जित्ने कुरामा कुनै शंका छैन : गगन थापा

काठमाडौँ। आज (शनिबार) काठमाडौँ निर्वाचन क्षेत्र नम्बर ४ स्थित कपनमा आयोजित एक कार्यक्रममा बोल्दै नेपाली कांग्रेसका महामन्त्री तथा सोही क्षेत्रका प्रतिनिधिसभा सदस्य उम्मेदवार गगन कुमार थापाले गठबन्धनले चुनाव जित्ने कुरामा कुनै शंका नभएको बताएका छन्।

उनले भने, ‘मलाई चुनावको डर छैन, जित्छौँ कि जित्दैनौँ भन्ने छैन। ढुक्कसँग जित्छौँ, तर चुनाव जितेको भोलिपल्टबाट चाहिँ के गर्छौँ ?, सरकार बनाउँछौँ भनौँ भने अहिले पनि हाम्रो सरकार छ। चुनावपछि सरकार बनाएर काम गर्न सक्दैनौँ कि भन्ने डर छ। ’

कपन धोबीखोला अबस्थित कार्की इभेन्टमा भएको नेपाली कांग्रेस सोलु काठमाडौं क्षेत्र नम्बर ४ सम्पर्क समितीले आयोजना गरेको अन्तरक्रिया कार्यक्रममा मतदाताहरूसँग छलफल गर्दै थापाले गठबन्धनले निर्वाचन ढुक्कसँग जित्ने, तर जितेपछि काम गर्न नसक्ने हो कि भन्ने डर आफूलाई रहेको बताएका हुन् ।

आगामी दिनलाई लिएर आफूमा डर भएकाले गठबन्धनका नेताहरूमा पनि आफूलाई जस्तै डर हुनुपर्ने उनले बताए । उनी भन्छन् , ‘गठबन्धनको बैठकमा गएर म हराउँदिन बिलाउँदिन, प्रश्न गर्छु । खबरदारी गरेर झकझक्याउँछु ।

तर, आवश्यकता परेको अवस्थामा गाडी चलाउने ठाउँमा आफैँ गएर बस्छु । त्यो आँट मसँग छ । हामीलाई बिराउने सुविधा छैन ।’ अन्तरक्रिया कार्यक्रममा एमाले लगायत बिभिन्न राजनैतिक दलबाट नेपाली कांग्रेसमा प्रवेस गरेका ३० जना भन्दा बढीलाई थापाले खादा र अविर लगाइदिएर पार्टी प्रवेस समेत गराएका थिए ।