रोनाल्डोले गरे साउदी क्लब अल नासरसँग कीर्तिमानी सम्झौता

काठमाडौँ । क्रिस्टियानो रोनाल्डोअन्तत: साउदी क्लब अल नासरमा आवद्ध भएका छन् ।

म्यानचेस्टर युनाइटेडबाट बाहिरिएपछि रोनाल्डो क्लबविहिन रहेका थिए । उनले च्याम्पियन्स लिग खेल्ने क्लब जाने प्रयास गरेपनि सफल नभएपछि साउदी अरबको क्लबले गरेको बम्पर अफरलाई स्वीकार गर्दै अल नासरसँग साढे दुई बर्षको सम्झौता गरेका हुन् ।

रोनाल्डोलाई अल नासरले बार्षिक करिब २०० मिलियन डलर रकम दिने भएको छ । यो रकम कुनै पनि फुटबल खेलाडीलाई दिएको अहिलेसम्मकै बढी हो । रोनाल्डो २०२५ को जुनसम्म अल नासरमा रहने छन् ।

अल नासरले रोनाल्डोलाई भित्र्याएको घोषणा गर्दै यो एक खेलाडी भित्र्याउने हस्ताक्षर मात्र नभएर हाम्रो क्लब, यस क्षेत्रको भाषा, देश र भविष्यको पिढीका लागि ठुलो प्रेरणा हुने उल्लेख गरेको छ ।

रोनाल्डोले पनि नयाँ क्लबमा खेल्न आफु उत्साहित रहेको बताउदै क्लबको सफलतामा आफुले योगदान गर्न तयार रहेको बताएका छन् ।