राजश्व संकलनको नयाँ जुक्ति : गुनासो सुन्दै, व्यापारी फकाउँदै मेयर/उपमेयर
मकालु खबर
विराटनगर । विराटनगर महानगरपालिका कार्यालयबाट नगर प्रहरी सहित मेयर, उपमेयर, प्रमुख प्रशासकीय अधिकृत सहित कर्मचारी र वडा अध्यक्षहरूको टोली निस्कियो । प्रदेशद्धारबाट बाहिर निस्किएको टोली मध्ये मेयर नागेश कोइराला मेनरोडको बायाँ तर्फको सडक किरानातर्फ लागे भने पश्चिम तर्फको सडक किनारमा उपमेयर शिल्पा निराला कार्कीको टोली हिँड्यो ।
महानगरपालिका कार्यालयबाट दक्षिण तर्फ लागेको टोली हरेक पसलहरूमा छिर्दै गयो । मेयरको एउटा समूह थियो भने उपमेयरको अर्को समूह थियो । दुवै टोलीमा नगर प्रहरी, कर्मचारी र जनप्रतिनिधि तोकिएकै अनुरूप थिए । अगाडी बढ्दै गएको मेयर कोइरालाको टोली चुनचुन रायको खाजा तथा चिया पसलमा छिर्यो ।
मेयर कोइरालाले उनलाई सोधे, ‘तपाईँलाई महानगरको कुनै समस्या छ ?’
रायले भने, ‘छैन हजुर ?’
मेयर कोइरालाले फेरी सोधे, सरसफाइको लागि सदस्य बन्नु भएको छ ? तपाईँको पसल दर्ता भएको छ? नवीकरण किन नगर्नु भएको ? सडक पेटीमा किन सामाग्री राख्नु भएको ? मेयरका यी प्रश्नको जवाफ व्यवसायी रायले दिई रहे ।
मेयरसँगै गएका कर्मचारीले रायको पसलको बारेमा सबै विवरण टिपेर लगे । व्यवसायी रायले भने, ‘मैले नगरपालिकामा व्यवसाय दर्ता गरेको भएपनि नवीकरण गरेको थिइन्, अब भोलि नै गएर नवीकरण गर्छु, फोहोर आफैँले लगेर फाल्ने गरेको थिएँ, मेयर साबले हामीलाई तत्काल सदस्य बन्न भन्नु भएको छ, त्यही अनुसार एक हप्ता भित्रमा दर्ता गरेर फोहोरको पनि पैसा तिर्छु ।’
मूल सडकको पश्चिमतर्फको सडक पेटीबाट व्यवसायीहरूसँग छलफल गर्दै हिँडेकी उपमेयर कार्की पंकज किराना स्टोर, बाबा ग्यास डिलर हुँदै राजस्थानी ढावा हुँदैअघि बढिन् । उनले व्यवसायीलाई व्यवसाय दर्ता गर्नको लागि अभिप्रेरित गरिन् भनेँ फोहोर व्यवस्थापनको लागि सहयोग गर्न आग्रह गरिन् ।
हामी महानगरपालिकासँग तपाईँको कुनै गुनासो छ ? फोहोर उठाउन समयमा गाडी आउँछ की आउँदैन, महानगरपालिकाका कर्मचारीले गर्ने व्यवहार कस्तो छ ? उपमेयर कार्कीले सोधेको यो प्रश्नमा व्यवसायीले महानगरपालिकाका गुनासा भन्दा पनि आफ्नो दायित्व बढी महसुस गरेको देखिन्थ्यो ।
विराटनगर महानगरपालिकाले पसलमै पुगेर व्यापारीका गुनासो र सुझाव संकलन शुरु गरेको हो । जनताको घरदैलोमै पुगेर गुनासो सुन्ने सुझाव संकलन गर्ने अभियान अन्तर्गत पहिलो चरणमा मेनरोडका व्यापारीहरूका गुनासो र सुझाव संकलन गरिएको छ ।
मेयर कोइराला र उपमेयर कार्कीले फुटपाथको अवस्था, फोहोर व्यवस्थापन, बिजुलीबत्ती, महानगरका कर्मचारीबाट सेवाग्राहीलाई गर्ने व्यवहारलगायतका विषयमा जिज्ञासा राखेका थिए । जनताकै बिचमा गएर महानगरले प्रवाह गर्ने सेवाका विषयमा जानकारी लिन सुरु गरिएको पहिलो अभ्यास हो । ‘हामीले व्यापारीहरूबाट कर मात्रै संकलन गर्ने होइन उहाँहरूका पीरमर्का, सुधार गर्नुपर्ने पक्ष, कर्मचारीले सेवाग्राहीलाई गर्ने व्यवहारका बारेमा जानकारी लिन सुरु गरेका छौँ,’ मेयर कोइरालाले भने, ‘यसलाई अभियानकै रूपमा अगाडि बढाएका छौँ ।’
त्यस्तै टोलीले व्यवसाय दर्ता, नवीकरण र फोहोरको सदस्य बने नबनेको समेत अनुगमन गरेको छ। व्यापारीहरूले पछिल्लो समय फोहोर व्यवस्थापन र फुटपाथमा व्यापक सुधार भएको बताएका छन् ।
विराटनगर महानगरपालिका अगाडी व्यवसाय सञ्चालन गरेर बसेका व्यवसायी अजय अग्रवालले महानगरपालिकाले पछिल्लो एक महिनामा सरसफाइ र फोहोर व्यवस्थापनमा उल्लेख्य सुधार गरेको बताए । उनले अभियानलाई व्यवहारिक भन्दै व्यवसायीबाट आएको समस्यालाई समाधान गरेर जानका लागि पनि सुझाव दिए । व्यवसायीले नेट र केवलको तारको व्यवस्थापन गर्न सुझाव दिएका छन् । मेयर र उपमेयर पसलमै पुगेर गुनासो सुन्दा व्यापारीहरूले स्थानीय सरकार भएको महसुस गरेको प्रतिक्रिया दिए ।
सरसफाइ, फुटपाथ व्यवस्थापन र सेवा प्रवाहमा धेरै नै सुधार आएको भगतको उनीहरूको भनाई छ । ‘सबैभन्दा फोहोर व्यवस्थापनमा सुधार आएको छ,’ उनले भने, ‘अव्यवस्थित तारका कारण सहरको सौन्दर्ययता गुमेको छ, बिजुली, नेट र केवलको तारको व्यवस्थापन हुने हो भने विराटनगर धेरै व्यवस्थित र सफा देखिने छ ।’
उपमेयर कार्कीका अनुसार यो अभियान एकदिनको मात्र नभई हप्तामा दुई पटकसम्म हुनेछ । यो अभियानको शुरुवात मात्र हो,’ उनले भनिन्, ‘हामीले व्यापारीका समस्या सुन्ने र महानगरपालिकाको कुरा सुनाउने गरी काम थालेका हौँ ।
अनुगमनमा प्रमुख प्रशासकीय अधिकृत विष्णुप्रसाद कोइराला, वडा नम्बर २ का वडाध्यक्ष कुमार पोखरेल, ३ का वासुबहादुर बस्नेत, ७ का मधुबाबु तिवारी, ८ का राम पोखरेल, ९ का विश्वनाथ भगत, १० का अर्जुन गिरीसहित महानगरका विभिन्न महाशाखा र शाखा प्रमुख, कर्मचारी तथा महानगर प्रहरीको सहभागिता रहेको थियो । अभियानको पहिलो दिन बिहीबार टोलीले महानगरको गेटदेखि सातघुम्तीसम्म अनुगमन गरेको छ ।
मकालु खबर
