केन्द्र र प्रदेशको तालमेल मिलेन, माओवादी सरकारमा सामेल नहुने
मकालु खबर
काठमाडाैँ । नेकपा माओवादी केन्द्र प्रदेश १ सरकारमा तत्काल सहभागी नहुने भएको छ । केन्द्रमा भएको सहमतिप्रति असन्तुष्टि जनाउँदै माओवादी केन्द्र सरकारमा तत्काल सहभागी नहुने भएको हो ।
माओवादी केन्द्र प्रदेश १ का संसदीय दलका नेता इन्द्रबहादुर आङ्बोले केन्द्रको निर्णयले प्रदेश १ को सिङ्गो माओवादी पार्टीको अपमान भएको बताए । ‘माथिको निर्णयले माओवादी प्रदेश १ को अपमान भएको छ,’ उनले भने, ‘आलोपालोबारे लिखित सहमति नभएसम्म हामी सरकारमा सहभागी हुँदैनौँ ।’
यसअघि एमाले र माओवादी दुवै दलका शीर्ष नेताले प्रदेश सरकारमा आलोपालो हुने बताएका थिए । मुख्यमन्त्रीको दाबी गर्न प्रदेश प्रमुखकोमा जानु अगाडि एमाले संसदीय दलका नेता हिक्मतकुमार कार्कीले पनि गठबन्धन ५ वर्ष कायम हुने बताउँदै मुख्यमन्त्री र मन्त्रीहरू परिवर्तन हुनसक्ने बताएका थिए ।
तर, हिजो साँझ शीर्ष नेताहरुबीच भएको सहमतिमा मुख्यमन्त्री ५ वर्ष नै एमालेले पाउने उल्लेख भएपछि माओवादी असन्तुष्ट भएको हो । सरकारलाई दिएको समर्थन भने यथावत् रहने माओवादीले जनाएको छ । केन्द्रबाट भएको भागबण्डामा प्रदेश १ मा माओवादीले सभामुख मात्रै पाएको छ भने मुख्यमन्त्री आलोपालो गर्ने विषय उल्लेख छैन ।
एमालेका तर्फबाट हिजै प्रदेश १ को मुख्यमन्त्रीमा हिक्मतकुमार कार्की नियुक्त भइसकेका छन् । कार्कीलाई आज दिउँसो २ बजे शपथग्रहण गराउने कार्यक्रम छ । कार्कीको शपथ लगत्तै सानो आकारको मन्त्रीमण्डल आजै विस्तार गर्ने तयारी थियो ।
यद्यपि माओवादी केन्द्र तत्काल सरकारमा नजाने भएपछि तरङ्ग उत्पन्न भएको छ । माओवादीले आज सरकारमा सहभागी नहुने विषयको जानकारी मुख्यमन्त्री हिक्मतकुमार कार्कीलाई दिइसकेको छ ।
मकालु खबर
