लयमै न्यूक्यासल, चेल्सीको पनि जित

काठमाडौँ । ईङलिश प्रिमियर लिग अन्तर्गत चेल्सीले क्रिस्टल प्यालेसलाई पराजित गरेको छ । गएराती सम्पन्न खेलमा चेल्सीले क्रिस्टल प्यालेसलाई १-० गोल अन्तरले पराजित गरेको हो ।

चेल्सीको जितमा खेलको ६४औँ मिनेटमा काइ हाभेर्टले गरेको खेलको एक मात्र गोल नै निर्णायक गोल बनेको थियो । यस सिजनमा खराब प्रदर्शन गरिरहेको चेल्सीको यो १९औ खेलमा केवल आठौँ जित हो ।

यो जितपछि चेल्सीको २८ अंक भएको छ र लिगमा १०औं स्थानमा उक्लिएको छ । त्यस्तै क्रिस्टल प्यालेसको १८ खेलमा २२ अंक छ र लिगमा १२औं स्थानमा छ ।

अर्काे खेलमा न्यूक्यासल युनाइटेडले फुलहमलाई १-० ले पराजित गरेको छ । न्यूक्यासलको जितमा खेलको अन्तिम समयमा एलेक्सान्डर इसाकले गरेको गोल नै निर्णायक बन्यो । उनले ८९औं मिनेटमा कलुम विल्सनको पासलाई सदुपयोग गरेका थिए । त्यसअघि ७०औं मिनेटमा फुलहमका एलेक्सान्डर मित्रोभिच पेनाल्टीमा चुकेका थिए ।

यस जितसँगै न्यूक्यासल १९ खेलबाट ३८ अंक जोडेर तेस्रो स्थानमा उक्लिएको छ । समान ३८ अंक नै भएपनि एक खेल कम खेलेको म्यानचेस्टर युनाइटेड गोलअन्तरमा पछि छ । पराजित फुलहम ३१ अंक जोडेर छैटौं स्थानमा रहेको छ ।