गोंगबुको मोबाइल पसल लुटपाट र आगजनीमा संलग्न ९ जना पक्राउ

काठमाडौँ । यातायात मजदुरको आन्दोलनको क्रममा गोंगबुको नयाँ बसपार्क स्थित ल्होत्से मलमा मोबाइल पसल तोडफोड गरी लुटपाट गरेको र प्रहरीको भ्यानमा आगजनी गरेको आरोपमा प्रहरीले ९ जनालाई पक्राउ गरी सार्वजनिक गरेको छ ।

जिल्ला प्रहरी परिसर काठमाडौँका प्रमुख एसएसपी दानबहादुर कार्कीले उनीहरुलाई पक्राउ गरेको जानकारी दिएका हन् । प्रहरीका अनुसार पक्राउ परेका मध्ये ५ जनाले प्रहरी भ्यानमा आगजनी गरेका थिए । अन्य ४ जनाले मोबाइल पसलमा लुटपाट गर्ने कार्यमा संलग्न भएका हुन् ।

प्रहरीले पत्रकार सम्मेलन गरी उनीहरुलाई सार्वजनिक गरेको हो ।

सामाजिक सञ्जालमा आएका भिडिओ फुटेज र अन्य सूचनाका आधारमा उनीहरुलाई पक्राउ गरिएको प्रहरीले जनाएको छ ।