सांसद चन्द्र भण्डारीलाई थप उपचारका लागि मुम्बई लगियो

सांसद चन्द्र भण्डारीलाई थप उपचारका लागि मुम्बई लगियो

काठमाडौँ । खाना पकाउने ग्यास लिक भई आगो लागेर गम्भीर घाइते भएका कांग्रेस नेता तथा सांसद चन्द्र भण्डारीलाई थप उपचारका लागि भारतको मुम्बई लगिएको छ । कीर्तिपुर बर्न अस्पतालले उनलाई थप उपचारका लागि मुम्बईको नेशनल बर्नस् सेन्टर रिफर गरेपछि उनलाई मुम्बई लगिएको हो ।

बिहीबार दिउँसो श्री एयरलाइन्सको विशेष(चार्टर्ड) उडानबाट उनलाई मुम्बई लगिएको हो ।

उनीसँगै स्वास्थ्यकर्मीकाे टाेली पनि गएकाे छ । टोलीमा नर्भिक अस्पतालका ३ जना डाक्टर र ३ जना पारामेडिक्स समावेश रहेकाे स्वास्थ्य तथा जनसंख्या मन्त्री पदम गिरीको सचिवालयले जनाएको छ । क्रिटिकल केयर प्रमुख डा. प्रदिप तिवारी, एनेस्थेसिया क्रिटिकल केयर डा।वृहस्पति र फ्लाइट डाक्टर डा.रोशन शर्मा रहेका छन् भने तीन जना पारामेडिक्स ईआरमा दिनेश राई, सागर महर्जन र राज तामाङ रहेका छन् ।

स्वास नलीमा जलनले असर र सुन्निन सक्ने जोखिम भएको हुँदा स्वास नलीमा पाइप राखी (इन्टुबेसन गरी) अक्सिजन दिँदै लगिएको चिकित्सकले जनाएका छन् ।

बुद्धनगरस्थित घरमा बुधबार राती आगलागीमा परी भण्डारी घाइते भएका हुन् । उक्त घटनामा घाइते भएकी भण्डारीकी आमा हरिकला भण्डारीको निधन भएको छ ।

भण्डारीको शरीरको ३० प्रतिशत भाग जलेको छ ।