घरको गेट सडकमा खस्दा ३ वर्षीय बालकको मृत्यु

जनकपुरधाम । घरको फलामे गेट खसेपछि जनकपुरधाम उपमहानगरपालिका ११ स्थित सडकमा खेलिरहेका एक बालकको किचिएर मृत्यु भएको छ ।

स्थानीय आलम राइनका ३ वर्षीय छोरा अहि हुसैनको मृत्यु भएको हो । उनी सडकमा खेलिरहेका थिए । फलामे गेट सडकतर्फ खस्दा किचिएर बालक अलिको मृत्यु भएको स्थानीयले बताएका छन् । गेट खसेको घर जनकपुरमा बाबा पेट्रोल पम्पका सञ्चालक रहेको विष्णुदेव साहको हो । उनका बुहारी सोनम साहले दुस्मनीका कारण जानेर गेट खसालेर घटना घटाएको मृतक बालकका आफन्तले आरोप लगाएका छन् ।

घटनापछि मृतक बालकका आफन्त आक्रोशित बनेर साहको घर तोडफोड गर्ने प्रयास गरेका छन् । अहिले त्यहाँ ठुलो संख्यामा प्रहरी परिचालित भएका छन् । प्रहरीले घरधनी साह र उनका छोरालाई नियन्त्रणमा लिएको छ ।