जनकपुरधामको अन्तरगृह परिक्रमा गरेसँगै सकियो १५ दिने ऐतिहासिक मिथिला परिक्रमा
जनकपुरधाम । १५ दिने ऐतिहासिक तथा धार्मिक महत्त्व बोकेको मिथिला परिक्रमाअन्तर्गत आज जनकपुरधामको अन्तरगृह परिक्रमा गरिएको छ ।
परिक्रमामा सहभागीहरू आज गरिब विपन्नलाई दान गर्ने चलन छ । दान लिनका जनकपुरधामको सडकमा जताततै गरिब विपन्नहरू कपडा ओछ्याएर बसेका छन् । उनीहरूलाई परिक्रमामा सहभागीहरू चामल र नगद दान गरिरहेका छन् ।
फागुन प्रतिपदा अर्थात् ८ फाल्गुनमा धनुषाको कचुरीबाट शुरू भएको मिथिला माध्यमिकी परिक्रमामा सहभागीहरू आज जनकपुरधामको अन्तरगृह परिक्रमा गरी सम्पन्न हुन्छ । प्राचीन मिथिलाको राजधानी जनकपुरधामलाई केन्द्रबिन्दु मानी यसको चारैतिरका क्षेत्रसँग जोडिएका गाउँ, नगरमा स्थितका तीर्थस्थलको भ्रमण गरिने परिक्रमालाई मिथिला मध्यमा परिक्रमा भनिन्छ ।
मिथिला महात्म्यका अनुसार मिथिलापुरीको यात्राफल राम्रो मानिन्छ । मिथिला क्षेत्रमा भाग्यले जन्म हुन्छ, यस क्षेत्रको यात्रा गर्नाले अनन्त फल प्राप्त हुनुका साथै मुण्डन, एकाध साँझ उपवास र बास बसेमा लाभ हुने विश्वास पनि मिथिला महात्म्यमा उल्लेख छ ।
यज्ञ, मन्दिर, नदी तथा व्यक्ति आदिको परिक्रमा पुण्यदायी हुने गरेको आस्थाअनुरूप मिथिला परिक्रमाअन्तर्गत १३० किलोमिटरका क्षेत्रमा पदयात्रा गरिन्छ । यो परिक्रमा मेलामा सामेल भएमा पापबाट मुक्ति पाउने, रोगव्याधी निको हुने तथा जीवनको अन्त्यमा स्वर्ग प्राप्त हुने जनविश्वास छ ।
