उपराष्ट्रपतिका उम्मेदवार राम सहायप्रसाद यादवविरुद्ध एमालेको उजुरी
मकालु खबर
काठमाडौँ । उपराष्ट्रपतिका उम्मेदवार रामसहायप्रसाद यादवविरुद्ध निर्वाचन आयोगमा उजुरी परेको छ ।
नेकपा एमालेका तर्फबाट उपराष्ट्रपतिको उम्मेदवार रहेकी अष्टलक्ष्मी शाक्यका प्रतिनिधि महेश बर्तौलाले उजुरी दर्ता गराएका हुन् ।
बिहान ९ बजेदेखि ३ बजेसम्म उम्मेदवारी दर्ताको कार्यक्रम सकिएपछि निर्वाचन कार्यक्रम तालिका अन्तर्गत उपराष्ट्रपतिका उम्मेदवार विरुद्धको दाबी विरोधको कार्यक्रम सुरु भएपछि बर्तौलाले यादवको उम्मेदवारी विरुद्ध उजुरी गरेका हुन् ।
उक्त उजुरीमा नेपालको संविधानको धारा ७० ले राष्ट्रपति र उपराष्ट्रपति फरक–फरक लिङ्ग वा समुदायको हुनुपर्ने व्यवस्था रहेको र राष्ट्रपति र उपराष्ट्रपतिको निर्वाचनसम्बन्धी ऐन २०७४ को दफा १६ को ५ अनुसार पनि उपराष्ट्रपतिको लागि उम्मेदवार मनोनयन गर्दा राष्ट्रपति पदमा निर्वाचित व्यक्तिभन्दा फरक लिङ्ग वा समुदायको हुनुपर्ने उल्लेख भएको जिकिर सहित पेस गरिएको छ । भने, सो उजुरीमा ‘यस आधारमा समेत राष्ट्रपति पदमा खस आर्य समुदायबाट पुरुष निर्वाचित भइसकेको अवस्थामा उपराष्ट्रपति पदमा खस आर्य समुदायको पुरुषबाहेक मात्र उम्मेदवार हुनसक्छ । यसैले सो पदमा पुरुष उम्मेदवार हुन सक्दैन ।’
यस्तै नेपालको संविधानको प्रस्तावनामा उल्लेख समानुपातिक समावेशी प्रतिनिधित्वको व्यवस्था गरेको, संविधानको धारा ३८ को ४ ले महिलालाई सबै निकायमा समानुपातिक समावेशी सिद्धान्तको आधारमा सहभागी हुने हक स्पष्ट व्यवस्था गरेको अवस्थामा राष्ट्रपति र उपराष्ट्रपति पद दुवैमा पुरुष निर्वाचित हुने परिकल्पना संविधानले नगरेको विषय सहित उपराष्ट्रपतिका उम्मेदवार यादवको उम्मेदवारी खारेजीको माग गरिएको छ ।
यस्तो छ उजुरी:
मकालु खबर
