धनुषाबाट १२४ किलाे लागु औषध गाँजासहित एकजना पक्राउ
मकालु खबर
जनकपुरधाम । प्रहरीले धनुषाबाट भारी मात्रामा लागु औषध गाँजासहित एक जनालाई पक्राउ गरेको छ । एक क्विन्टलभन्दा बढी गाँजा तस्करी गर्ने ट्रकसहित चालकलाई प्रहरीले पक्राउ गरेको छ । विशेष सुराकीको आधारमा शुक्रबार दिउँसो करिब १ बजेतिर प्रदेश प्रहरी कार्यालय जनकपुरधामबाट खटेको प्रहरी टोलीले भारी परिमाणमा गाँजा बरामद गरेको हो ।
खाली ट्रकभित्र जस्ताले घेरेर लुकाएर लाँदै गरेको अवस्थामा प्रहरीले बरामद गरेको छ । प्रहरीले विशेष सूचनाको आधारमा ११ किलोको १२ वटा पोकामा रहेको १ क्विन्टल २४ किलो गाँजा बरामद गरेको हो । ट्रकसहित गाँजा र चालकलाई समेत नियन्त्रणमा लिएको प्रदेश प्रहरीले जनाएको छ । प्रहरीले ढल्केबरतिरबाट जनकपुरधामतर्फ गइरहेको ना ७ ख ४२५१ नम्बरको ट्रकउपर शंका लागी चेकजाँच गर्दा गाँजा बरामद गरेको प्रहरीले जनाएको छ ।
गाँजासहित ट्रक चालक मनहरी नगरपालिका ८ मकवानपुर जिल्ला घर भएका सन्तवीर दोङ्लाई नियन्त्रणमा लिएको प्रदेश प्रहरीले जनाएको छ । उक्त गाँजा पहाडी जिल्लाबाट ल्याई भारततर्फ लाँदै गरेको प्रहरीको प्रारम्भिक अनुमान छ । पक्राउ गरिएको ट्रक चालकलाई अहिले अस्थायी प्रहरी चौकी लक्ष्मिनियामा राखिएको छ ।
बरामद गरेको गाँजा ट्रक र चालकलाई अब थप अनुसन्धानको लागी प्रदेश प्रहरी टोलीले जिल्ला प्रहरी कार्यालय धनुषामा पठाउने कार्य गरिरहेको छ ।
मकालु खबर
