चेल्सी र टोटनह्याम स्तब्ध

काठमाडौँ । ईङलिश प्रिमियर लिग अन्तर्गत बोर्नमाउथले टोटनह्यामलाई पराजित गरेको छ । शनिबार राति सम्पन्न खेलमा बोर्नमाउथले टोटनह्यामलाई ३-२ गोल अन्तरले पराजित गरेको हो ।

बोर्नमाउथको जितमा माटियास भिना, डोमोनिक सोलान्के र डान्गो ओउट्टाराले एक एक गोल गरेका थिए । त्यस्तै टोटनह्यामका लागि सन हेंग मिन र अर्नाउट डान्जुमाले एक एक गोल गरेका थिए ।

यो जितपछि बोर्नमाउथको ३१ खेलमा ३३ अंक भएको छ र लिगमा १४औं स्थानमा उक्लिएको छ । त्यस्तै टोटनह्यामको भने ३१ खेलमा ५३ अंक छ र लिगमा पाँचौ स्थानमा रहेको छ ।

अर्काे खेलमा चेल्सी घरेलु मैदानमा ब्राइटनसँग २-१ ले पराजित भएको छ । ब्राइटनको जितमा डानी वेलब्याक र जुलिओ एनसीसोले एक एक गोल गरेका थिए भने चेल्सीका लागि कोनोर गाल्लाघेरले एक गोल गरेका थिए ।

यो जितपछि ब्राइटनको २९ खेलमा ४९ अंक भएको छ र लिगमा सातौं स्थानमा उक्लिएको छ । त्यस्तै चेल्सीको भने पराजयको सिलसिला जारी रहेको छ । चेल्सीको यस सिजनमा यो १२औं हार हो । यस खेलपछि चेल्सीको ३० खेलमा ४२ अंक रहेको छ र लिगमा ११औं स्थानमा रहेको छ ।