कपनकी निराको हत्या आरोपित झापाबाट पक्राउ, काठमाडौँ ल्याइँदै

काठमाडौँ । निरा पाण्डे आचार्यको हत्यामा संलग्न भएको आरोपमा प्रहरीले एक जनालाई पक्राउ गरेको छ । गत वैशाख ७ गते आमाको मुख हेर्ने दिन पसलमै मारिएकी कपनको सरस्वतीनगरस्थित निरु किचनकी सञ्चालक निराको हत्यामा संलग्न रहेको आशंकामा प्रहरीले झापाबाट विनोद विकलाई पक्राउ गरेको हो ।

प्रकरणको अनुसन्धानका लागि गठित छानबिन समितिले शनिबार राती उनलाई पक्राउ गरेको जनाइएको छ । पक्राउ परेका विकको बारेमा थप अनुसन्धान पछि सार्वजनिक गरिनेछ । उनलाई काठमाडौँ ल्याउने तयारी भइरहेको बुझिएको छ ।

घटनाबारे अनुसन्धान गर्न प्रहरी प्रधान कार्यालयले केन्द्रीय अनुसन्धान ब्यूरोकी प्रहरी अतिरिक्त महानिरीक्षक (एआईजी) किरण बज्राचार्यको नेतृत्वमा समिति गठन गरेको छ ।

पसल बसिरहेको बेला दिनदहाडै छुरा प्रहार गरेर पाण्डेको हत्या भएको थियो । उनको शरीरमा कम्तीमा १९ पटक छुरा प्रहार गरिएको थियो ।