समाजवादी मोर्चा सत्ता टिकाउने मोर्चा मात्रै नबनोस् : नेता खनाल

काठमाडाैँ । पूर्वप्रधानमन्त्री नेकपा(एकीकृत समाजवादी)का सम्मानित नेता झलनाथ खनालले समाजवादी मोर्चालाई सत्ता टिकाउने मोर्चा मात्र नबनाउन नेताहरुलाई आग्रह गरेका छन् ।

सोमबार काठमाडौँमा आयोजित समाजवादी मोर्चा नेपाल घोषणा कार्यक्रमलाई सम्बोधन गर्दै पूर्वप्रधानमन्त्री खनालले समाजवादी मोर्चा केवल सत्ता टिकाउने मोर्चा मात्रै नबनाउन नेताहरुलाई आग्रह गरेका हुन् ।

उनले देशभरका वामपन्थी, समाजवादी र क्रान्तिकारीहरुलाई एकतावद्ध नगरेसम्म देशमा सही विकल्प निर्माण हुन नसक्ने बताए । उनले यो समाजवादी मोर्चालाई अझ बिस्तार गर्नु आवश्यक रहेको बताए । आज बनेको मोर्चा, मोर्चा निर्माणको पहिलो पाइला मात्रै भएको उनको भनाइ छ ।

उनले देशको भविष्यलाई उज्यालो बनाउनका लागि आफूहरुको लक्ष्य समाजवादी गणतन्त्र भएको बताए । उनले देशमा भएका शोषण, दमन, अन्याय र अत्याचार समाप्त गर्ने एकमात्र विकल्प समाजवाद भएकाले आफूहरु त्यसप्रति प्रतिवद्ध रहेको बताए ।