अमेरिकाविरुद्ध नेपालले सुरू गर्यो फिल्डिङ

काठमाडौँ । विश्वकप छनोट क्रिकेट खेलअन्तर्गत नेपालले अमेरिकाविरुद्ध पहिला फिल्डिङ सुरु गरेको छ । जिम्बावेको हरारेको ताकासिंगा स्पार्टस् क्लबमा भइरहेको खेलामा टस जितेर नेपालले अमेरिकालाई ब्याटिङको निम्तो दिएको हो ।

नेपालको टिमले कप्तान रोहित पौडेलको कप्तानीमा खेलिरहेको छ । टोलीका खेलाडी सोमपाल कामी घाइते भएकोले उनको ठाउँमा ललित राजवंशीलाई टोलीमा राखेको छ ।

नेपाली टोलीमा कप्तान पौडेलसहित आसिफ शेख, कुशल भुर्तेल, भीम सार्की, कुशल मल्ल, आरिफ शेख, दीपेन्द्रसिंह ऐरी, करण केसी, गुल्शन झा, सन्दीप लामिछाने र ललित राजवंशी रहेका छन् ।

अमेरिकाका लागि कप्तान मोनांक पटेल अस्वस्थ रहेका कारण उनको स्थानमा निसर्ग पटेललाई खेलाइएको छ । खेलको कप्तानी एरोन जोन्सले गरिरहेका छन् ।

नेपाल र अमेरिकाबीच विश्वकप लिग २ मा ६ खेल भएको थियो । त्यसमध्ये नेपालले ३ खेल जितेको थियो । अमेरिकाले २ खेल जितेको थियो भने १ खेल ‘टाई’ भएको थियो । मंगलबारको खेलमा नेपालको जितको सम्भावना बलियो रहेको आकलन गरिएको छ ।