काठमाडौँका हलहरूमा सुरू भयाे हिन्दी फिल्म प्रदर्शन

काठमाडौँ। काठमाडौँका हलहरूमा आजदेखि हिन्दी फिल्म प्रदर्शनमा आएको छ ।

बिहीबार चलचित्र सङ्घको बैठकले आजदेखि हिन्दी फिल्म प्रदर्शन गर्ने निर्णय गरेको थियो । उक्त निर्णय पछि काठमाडौँका हलमा बलिउड अभिनेता विक्की कौशल र सारा अली खान अभिनीत फिल्म ‘जरा हटके जरा बचके’ प्रदर्शनमा आएको हो ।

नेपालको सबैभन्दा ठूलो मल्टिप्लेक्स चेन क्युएफएक्स र वान सिनेमाजले सो फिल्म प्रदर्शनमा ल्याएका हुन् ।

 काठमाडौँ महानगरका मेयर बालेन शाहले ‘आदिपुरुष’ मा ’जानकी भारतकी छोरी हुन्’ भन्ने भ्रमपूर्ण संवाद भारतबाट नहटेसम्म हिन्दी फिल्म चल्न नदिने बताउँदै सोमबारदेखि हिन्दी फिल्म प्रदर्शन रोक लगाएका थिए ।

बिहीबार उच्च अदालत पाटनले काठमाडौँमा हिन्दी फिल्म चल्न नदिने बालेनको निर्णयविरुद्ध अन्तरिम आदेश जारी गरेसँगै आजदेखि हिन्दी फिल्म प्रदर्शन हुन लागेको हो ।