सिरहामा प्रहरी जवानलाई पाता कसेर १२ घण्टासम्म यातना

काठमाडौँ ।  सिरहामा एक जना प्रहरी जवानलाई पाता कसेर यातना दिएको पाइएको छ । जिल्ला प्रहरी कार्यालय सिरहामा कार्यरत प्रहरी जवान अनु रायलाई पाता कसेर यातना दिइएको घटना बाहिरिएको हो ।

पीडित प्रहरीले मङ्गलवार साँझको बढी डिउटी गराएको गुनासो गर्न जाँदा प्रहरी निरीक्षक हेमन्त राईले यातना दिएको आरोप लगाएका छन् । हेमन्त राईले पाता कसेर १२ घण्टासम्म यातना दिएको पीडितलाई उनका भाइ रजनिस रायले बताए ।

‘दाइलाई बढी टिउटी गराउनुहुन्थ्यो । त्यही विषयमा ईन्सपेक्टर राई समक्ष गुनासो गर्न जानुभएको थियो । उल्टै झपारेपछि दुबैजनाबीच भनाभन भयो । त्यहीँ इन्सपेक्टर राईले दाइलाई पाता कसे,’ भाइ रजनिसले भने ‘जसको भिडियो प्रमाण छ । बुटैबुटले हिर्काएर १२ घण्टासम्म चरम यातना दिएका छन् ।’

उनले यो घटनाविरुद्ध उजुरी पनि दर्ता गराउने बताए ।

भिडियोमा प्रहरीले जिल्ला प्रहरी कार्यालय परिसरमा प्रहरी जवानलाई पाता कसेर राखेको देखिन्छ । उक्त भिडियोमा पीडित प्रहरी रोइरहेका देखिनछन् । साथै अन्य प्रहरी अधिकारीले उनलाई गालीगलौज तथा मादक पदार्थ सेवन कहाँ गरेको सोधिरहेका छन् ।

रायले जाँड रक्सी खाएर जिल्ला अदालत अगाडि स्थानीय बासिन्दालाई कुटपिट तथा दुर्व्यवहार गर्न थालेपछि समातेर ल्याइ सम्झाई बुझाई राखेको सिराहाका प्रहरी उपरीक्षक टेकुनन्द ईवा लिम्बुले बताए ।

‘मादक पदार्थ अथवा के खाएर पब्लिकलाई कुट्दै हिँड्ने भएपछि उसलाई नियन्त्रणमा लिएका हौँ। जथाभाबी पब्लिक, सिपाहीलाई कुटपिट  दुर्व्यवहार गरेपछि पाता कस्न परिहाल्छ नि । त्यो मेरो प्रहरी हो १’ एसपी लिम्बुले भने, ‘तर उनीमाथि कसैले कुटपिट गरेका छैनन् । कार्यालयमा ल्याएर सम्झाई बुझाई गरेको अवस्था हो ।’

एसपीले मादक पदार्थ सेवन गरेको भने पनि तत्कालै समयमा प्रादेशिक अस्पताल सिराहामा गरेको मेडिकल टेस्ट रिपोर्टमा भने मादक पदार्थ सेवन गरेको नदेखिएको उनका भाइले दाबी गरे ।