उकालोमा जीप पल्टिदा ७ वर्षीया शीतलको मृत्यु, ११ जना घाइते

पोखरा । पर्वतको देउरालीमा जीप दुर्घटना हुँदा एक जनाको मृत्यु भएको छ । कुश्माबाट दुर्लुङतर्फ जाँदै गरेको ग १ ज ५२२९ नम्बरको जीप कुश्मा नगरपालिका ३ देउराली भन्ने ठाउँमा दुर्घटना भएको हो ।

दुर्घटनामा कुश्मा ३ की ७ वर्षीया शीतल विकको मृत्यु भएको पर्वत प्रहरीले जनाएको छ । दुर्घटनामा गम्भीर घाइते शीतललाई उद्धार गरी पर्वत जिल्ला अस्पताल पठाउने क्रममा बाटोमा नै मृत्यु भएको हो । दुर्घटनामा ११ जना घाइते भएका छन् । ३ जनालाई जिल्ला अस्पताल पर्वतले पोखरा रिफर गरेको छ भने बाँकीको पर्वतमै उपचार भइरहेको छ ।

४ वर्षका प्रिन्स क्षेत्री, ३५ वर्षका मीनबहादुर क्षेत्री र ५० वर्षीया चन्द्रकला क्षेत्रीलाई हात खुट्टा, टाउको र ढाडमा चोट लागेकाले पोखरा रिफर गरिएको हो । उकालोमा जीपको अगाडीपट्टिको टायर उछिट्टिएर दुर्घटना भएको बताइएको छ ।