चार युवक सवार बाइक पल्टियो, तीन जनाको मृत्यु

काठमाडौँ । इटहरीमा मोटरसाइकल दुर्घटना हुँदा तीन जनाको मृत्यु भएको छ । शुक्रबार करिब १० बजेर ४० मिनेट जाँदा सुनसरीको इटहरी नगरपालिका-१७ कान्छी चोकमा चारजना चढेको मोटरसाइकल दुर्घटना भएको हो ।

जिल्ला प्रहरी कार्यालय सुनसरीका अनुसार विपरीत दिशाबाट आउँदै गरेको भारतीय नम्बर डब्लु बी ७३ इ ९११७ नम्बरको पिकअप भ्यानसँग ठोक्किएर दुर्घटना हुँदा तीनजनाको मृत्यु भएको छ । दुर्घटनामा परी चारै जना गम्भीर घाइते भएका थिए ।

उपचारका लागि धरानस्थित वीपी कोइराला स्वास्थ्य विज्ञान प्रतिष्ठान पठाइएकोमा तीन जनाको मृत्यु भएको छ । उपचारका क्रममा इटहरी १६ बस्ने अन्दाजी २६ वर्षीय करण चौधरी, सोही स्थानका २७ वर्षीय शम्भु चौधरी र २४ वर्षीय अनिनेश चौधरीको मृत्यु भएको डिएसपी राजकुमार राईले जानकारी दिए । २७ वर्षीय प्रेमलाल चौधरीको उपचार भइरहेको छ ।

चार जना सवार मोटरसाइकल अनियन्त्रित भई पिकअप भ्यानसँग ठोक्किएको प्रहरीको अनुमान छ । दुर्घटनाबारे थप अनुसन्धान भइरहेको डिएसपी राईले जानकारी दिए ।