बाइकमा सवारले चलाएका थिए महिलामाथि गोली

काठमाडौँ । नेपाल-भारत सीमा क्षेत्रमा एक महिलाको गोली हानी हत्या गरिएको छ । धनुषाको मुखियापट्टि मुसहरनिया गाउँपालिका-२ स्थित दशगजा पारी महिलाको गोली हानी हत्या गरिएको हो ।

मोटरसाइकलमा आएका दुई अज्ञात व्यक्तिले अन्दाजी २५ वर्षीया महिलालाई गएराति सवा ८ बजेतिर गोली हानी भारतिर भागेको प्रत्यक्षदर्शीलाई उद्धृत गर्दै जिल्ला प्रहरी कार्यालय धनुषा प्रहरीले जनाएको छ । ती महिला नेपाली हुन् कि भारतीय भन्ने खुलेको छैन ।

घटना दशगजा पारी भए पनि सीमा क्षेत्रमा भएकाले धनुषाका प्रहरी उपरीक्षक विश्वराज खड्कासहितको टोली घटनास्थल पुगेको थियो । दशगजा पारी भारततर्फ घटना भएकाले भारतीय प्रहरीसँग समन्वयन गरेर अनुसन्धान गरिरहेको प्रहरीको भनाई छ ।