ज्यामिरेमा रोकिराखेको ट्रकमा बाइक ठोक्किँदा २२ वर्षीय शम्भु र २१ वर्षीय सुशील गिरीको मृत्यु

काठमाडौँ । मकवानपुरमा ज्यामिरेमा रोकिराखेको ट्रकमा बाइक ठोक्किँदा दुई युवकको मृत्यु भएको छ । चितवनबाट हेटौँडातर्फ आउँदै गरेको ना५७प २३१ नम्बरको मोटरसाइकल मनहरी गाउँपालिका-९ ज्यामिरेमा सडकमा रोकी राखेको ना५ख ७४७२ नम्बरको ट्रकमा ठोक्किँदा दुर्घटनामा भएको हो ।

दुर्घटनामा परी मोटरसाइकलमा सवार मनहरी-९ का २२ वर्षीय शम्भु गिरी र २१ वर्षीय सुशील गिरी रहेको मकवानपुरका प्रहरी नायब उपरीक्षक टेकबहादुर कार्कीले जानकारी दिए । उनीहरूको चितवनको पुरानो मेडिकल कलेज भरतपुर अस्पतालमा उपचारका क्रममा मृत्यु भएको हो ।

प्रहरीले ट्रक र ट्रक चालकलाई नियन्त्रणमा लिई घटनाको बारेमा आवश्यक अनुसन्धान गरिरहेको जनाइएको छ ।