विवादपछि नेकपा समाजवादीको अपानि फिर्ता, माधवलाई सङ्कट
मकालु खबर
काठमाडौँ । नेकपा एकीकृत समाजवादीका अध्यक्ष माधवकुमार नेपालले नेताहरूको कार्य विभाजनसहित जारी गरेको अन्तरपार्टी निर्देशन (अपानि) ११ कार्यान्वयन नहुने भएको छ ।
शनिवार बसेको सचिवालय बैठकले उक्त अपानी रोक्ने निर्णय गरेको हो । सो पार्टीका सम्मानित नेता झलनाथ खनालले भदौ ५–७ मा बसेको पार्टीको केन्द्रीय समिति बैठकपछि जारी भएको अपानिको कार्यान्वयन रोक्ने निर्णय भएको जानकारी दिए ।
‘अस्ति जारी भएको अपानि कार्यान्वयनमा रोक लगाइएको छ त्यो अपानि कार्यान्वयन हुँदैन । अब पुन परिमार्जन गरेर मात्रै कार्यान्वयनमा जाने अर्को अपानि जारी हुन्छ’, नेता खनालले भने, ‘रोक्ने निर्णय भएपछि कार्यान्वयनमा जाने कुरै भएन ।’ उनले के–के विषय परिमार्जन हुने भन्नेबारे भने खुलाएनन् ।
अध्यक्ष नेपालले छलफलबिनै अपानि–११ जारी गरेको भन्दै नेताहरूले चर्को असन्तुष्टि जनाउँदै कतिपयले राजीनामा नै दिएका थिए ।
अध्यक्ष नेपालले २१ जना नेतालाई केन्द्रीय समितिमा मनोनयन र धेरै नेताहरूको कार्य विभाजन गरेको अपानि जारी गरेका थिए । तर उक्त अपानिप्रति सम्मानित नेता खनालले समेत आपत्ति जनाएका थिए ।
मकालु खबर
