लयमा फर्कियो टोटनह्याम, डिफेन्डिङ च्याम्पियन सिटी चौथो स्थानमा

काठमाडौँ । ईङलिश प्रिमियर लिग अन्तर्गत टोटनह्यामले न्यूक्यासल युनाइटेडलाई पराजित गरेको छ । गएराती सम्पन्न खेलमा टोटनह्यामले न्यूक्यासललाई ४-१ गोल अन्तरले पराजित गरेको हो ।

टोटनह्यामको जितमा रिचार्लिशनले दुई गोल गरेका थिए भने डेस्टिनी उडोगी र सन् हेंग मिनले एक एक गोल गरेका थिए । त्यस्तै न्यूक्यासलका लागि एक गोल जेलिंगटनले गरेका थिए । यो जितपछि टोटनह्यामको १६ खेलमा ३० अंक रहेको छ र लिगमा पाँचौं स्थानमा रहेको छ । न्यूक्यासलको यो यस सिजनमा छैटौं हार हो । १६ खेलमा २६ अंक रहेको न्यूक्यासल लिगमा सातौं स्थानमा रहेको छ ।

आइतबारका अन्य खेलमा म्यानचेस्टर सिटीले लुटन टाउनलाई २-१ ले हरायो भने एभरटन चेल्सीमाथि २-० ले विजयी रह्यो । डिफेन्डिङ च्याम्पियन सिटी ३३ अंकमा चौथो स्थानमा रहेको छ । यस्तै फुहलमले वेस्ट ह्यामलाई सजिलै ५-० ले पराजित गर्‍यो ।