कांग्रेसले मंगलबार पनि टुंग्याउन सकेन उम्मेदवार, बुधबार फेरि बैठक बस्ने
मकालु खबर
नेपाली कांग्रेसको कार्यसम्पादन समिति बैठक उपनिर्वाचनको उम्मेदवार टुंगो नलगाई सकिएको छ । सभापति शेरबहादुर देउवा र शेखर–गगन पक्षबिच उम्मेदवार चयनमा विवाद भएपछि बैठकले निर्णय लिन नसकेको हो ।
सभापति देउवाले बैठकमा इलाम–२ मा डम्बर खड्का र बझाङको प्रदेशसभा निर्वाचन क्षेत्र १ मा अभिषेक सिंहलाई उम्मेदवारका रुपमा प्रस्ताव गरेका थिए । सभापति देउवाको प्रस्तावमा नेता शेखर कोइराला र महामन्त्री गगन थापाले असहमति जनाएपछि उम्मेदवारको टुंगो लाग्न नसकेको एक पदाधिकारीले बताए ।
नेता कोइराला र थापाले इलाम— २ मा भेषराज आचार्य र बझाङमा जगत जोशी उम्मेदवार हुनुपर्ने मत राखेका थिए ।
महामन्त्री विश्वप्रकाश शर्मा र सहमहामन्त्री भिष्मराज आङदम्बेले गरेको इलाम—२ को अध्ययन रिपोर्टमा खड्कालाई उम्मेदवार बनाउन उपयुक्त हुने आशय थियो । नेता कोइराला र महामन्त्री थापाले आचार्यको नाममा अडान लिएपछि बैठक बिनानिष्कर्ष टुंगिएको छ ।
कांग्रेस प्रवक्ता प्रकाशशरण महतले बुधबार दिउँसो २ बजे उम्मेदवार टुंग्याउन पुनः बैठक बस्ने बताए ।
‘उम्मेदवारका विषयमा आज घनिभूत छलफल भएको छ । भोलि दिउँसो २ बजे कार्यसम्पादन समितिको बैठक बसेर उम्मेदवारको टुंगो लगाउँछ ,’ उनले भने । उनका अनुसार कार्यसम्पादन समिति बैठकको निर्णय अनुमोदन गर्न अपराह्न ४ बजे संसदीय बोर्डको बैठक बस्ने छ ।
मकालु खबर
