कोलोम्बिया एक खेलअगावै क्वाटरफाइनलमा

काठमाडौं । कोलोम्बिया कोपा अमेरिकाको क्वाटरफाइनलमा प्रवेश गरेको छ । शनिबार बिहान सकिएको खेलमा कोस्टारिकालाई ३-० गोल अन्तरले हराउँदै कोलोम्बिया एक खेलअगावै अन्तिम ८ मा प्रवेश गरेको हो ।

समूह डी’मा कोलोम्बिया ६ अंकका साथ शीर्ष स्थानमा रहेको छ । जारी प्रतियोगितामा कोस्टारिकाको पहिलो हार हो । यसअघिको खेलमा कोस्टारिका ब्राजिलसँग बराबरीमा रोकिएको थियो ।

एरिजोनामा भएको खेलमा कोलोम्बियाले ३१ औं मिनेटमा अग्रता लिएको थियो । कोस्टारिकाका गोलकिपर पेट्रिक सेक्वेराले कोलोम्बियाका जोन कोर्डोबालाई फल गरेपछि पेनाल्टी दिइएको थियो । उक्त पेनाल्टीलाई लुइस डियाजले गोल गर्दै कोलोम्बियालाई अग्रता दिलाए ।

५९ औं मिनेटमा जोन एरियासले दिएको पासमा डेविसन सान्चेजले हेडर गोल गर्दै अग्रता दोब्बर बनाए । ६२ औं मिनेटमा जेम्स रोड्रिगेजले दिएको थ्रो बलमा जोन कोर्डोबाले राइटफुटेड सट प्रहार गर्दै गोलमा परिणत गरेका थिए । ३–० को सहज अवस्थालाई अन्तिमसम्म कायम राख्दै कोलोम्बियाले महत्वपूर्ण ३ अंक लिन सफल भयो ।