उपाधिका लागि भारतविरुद्ध ब्लकमा ध्यान दिनुपर्छ-निरुता ठगुन्ना

राष्ट्रिय भलिबल टोलीकी स्पाइकर निरुता ठगुन्नाले भारतविरुद्धको फाइनल खेलमा नेपालले ब्लकमा ध्यान दिनु पर्ने बताएकी छन्।

मंगलबार इरानलाई पराजित गर्दै भारतसँगको भेट पक्का गरेपछि निरुताले यस्तो औंल्याएकी हुन्।

यसअघि समूह चरणमा नेपालले भारतलाई पराजित गरेको थियो। तर इरानसँग पराजित भएको नेपालले उसैलाई हराउँदै फाइनलमा स्थान बनाउन सफल भयो।

उच्च मनोबलमा रहेको नेपालकी उत्कृष्ठ स्पाइकर निरुताले जसरी पनि फाइनल खेल्नुपर्छ भन्ने उच्च मनोबलका साथ इरानसँग भिडेको बताइन्।

‘हामी निकै प्रेसरमा थियौँ। जसरी हुन्छ अंक ल्याउनुपर्छ भन्ने थियो। हामीलाई एकदम गाह्रो थियो’ निरुताले भनिन्, ‘तर जसरी पनि जितेर हामीले फाइनल खेल्नुपर्छ भन्ने थियो।’

सेमिफाइनलमा इरानविरुद्ध दोस्रो र तेस्रो सेट सुरुमा उनीहरुले अग्रता लिँदा नेपाली टोली थप प्रेसरमा खेल्नुपरेको उनको अनुभव छ।

भारतलाई समूह चरणमा हराए पनि फाइनलमा प्रेसर धेरै हुने र नतिजा जस्तो पनि आउन सक्ने बताइन्।

नेपालले अब ब्लकमा ध्यान दिएर राम्रो गर्न सके घरेलु मैदानमा उपाधि चुम्ने उनको विश्वास छ।