एनसेल फाउण्डेशनले गर्यो पलेशा लगायत खेलाडीलाई १६ लाख नगद सहित सम्मान
मकालु खबर
काठमाडौं । एनसेल फाउण्डेशनले पेरिस पारालम्पिक २०२४ मा ऐतिहासिक कास्य पदक विजेता पलेशा गोवर्धन लगायत खेलाडीलाई १६ लाख नगदसहित सम्मान गरेको छ ।
बिहीबार पेरिस पारालिम्पिकमा गौरवमय इतिहास रच्दै नेपाली खेलकुदको क्षेत्रमा देशको लागि इतिहासमै ठूलो पदक दिलाउन सफल पलेशालाई फाउण्डेशनले १० लाख नगदसहित सम्मान गरेको हो ।
राष्ट्रिय पारालिम्पिक कमिटी (एनपीसी) नेपालको २५ औँ वार्षिकोत्सवका अवसरमा आयोजित एक कार्यक्रममा एनसेलले पेरिस पारालिम्पिककी ऐतिहासिक कास्य पदक विजेता पलेशा सहित सहभागी ५ सदस्यीय टोलीलाई नगदसहित सम्मान गरेको हो ।
कम्पनीले आफ्नो व्यावसायिक सामाजिक जिम्मेवारी (सीएसआर) अन्तर्गत एनसेल फाउन्डेसनबाट यो पुरस्कार प्रदान गरेको हो । पलेशाकी पारा तेक्वान्दो प्रशिक्षक कविराज नेगी लामाले ३ लाख नगद पुरस्कार पाएका छन् ।
त्यसैगरी तेक्वान्दो खेलाडी भरहसिंह महता, पौडी खेलाडी भीमबहादुर कुमाल र पौडी प्रशिक्षक विजेनमान श्रेष्ठलाई जनही १ लाख नगद सहित पुरस्कृत गरिएको हो ।
“यो सम्मानले हामी पारा खेलाडीहरुको हौसला झन् बढाएको छ र अब देशका लागि स्वर्ण पदक नै ल्याउने मेरो उद्धेश्य रहेको छ । एनपीसीसँगको सहकार्यमा हाम्रो ओझेलमा परेको पारा खेलकुदको विकासमा योगदान पुर्याई दिनुभएकोमा एनसेलप्रति आभारी छु,”पलेशाले सम्मान ग्रहण गर्दै भनिन् ।
पारा खेलाडीहरुलाई युवा तथा खेलकुद मन्त्री तेजुलाल चौधरी, एनसेलका प्रमुख नियामक मामिला अधिकृत विशालमणी उपाध्याय, एनपीसीकी अध्यक्ष राधा घले र एनसेलकी कर्पोरेट कम्युनिकेशन एन्ड सीएसआर हेड विशाखालक्ष्मी खड्काले संयुक्त रुपमा पुरस्कार वितरण गरेका हुन् ।
सोही कार्यक्रममा एनपीसी नेपालले पारालिम्पिक खेलप्रति चासो राखी यसको विकासमा पुर्याएको सहयोगको उच्च मुल्याङ्कन गर्दै पारा खेलाडीहरुलाई उच्च मनोबल र हौसला प्रदान गरेकामा एनसेललाई पनि सम्मान गरेको छ । युवा तथा खेलकुद मन्त्री चौधरी लगायतले एनसेललाई म्मान गरेका हुन् ।
“एनसेल फाउन्डेसनको भर्खरै भएको शुभारम्भसँगै देशको लागि ऐतिहासिक पदक दिलाउन सफल पलेशासहित अन्य पारालिम्पियनलाई नगद पुरस्कारले सम्मान गर्न पाउँदा हामी अत्यन्तै खुसी छौ,” एनसेलकी कर्पोरेट कम्युनिकेशन एन्ड सीएसआर हेड विशाखालक्ष्मी खड्काले भनिन्,“एनपीसीसँगको सहकार्यमा हामी राष्ट्रिय पारा खेलाडीहरूको प्रेरणा बनेर हौसला प्रदान गर्दै एक बलियो साथ दिन प्रतिबद्ध छौं ।”
पलेशाले ऐतिहासिक पदक जितेपछि एनसेलले नगद पुरस्कारसहित उनलाई र अन्य सहभागी पारा खेलाडी र प्रशिक्षकहरुलाई सम्मान गर्ने घोषणा गरेको थियो ।
एनसेलले गत वर्ष देखि आफ्नो सेवा सञ्चालनको १८ औँ वार्षिकोत्सवको अवसरमा सीएसआर अन्तर्गत एनपीसीसँग सहकार्यको घोषणा गरेको थियो ।
यस सहकार्य अन्तर्गत कम्पनीले राष्ट्रिय तथा अन्तर्राष्ट्रिय खेलहरूमा नेपालको प्रतिनिधित्व गर्ने पारालिम्पिक राष्ट्रिय खेलाडीहरूको समग्र तालिम, विकास तथा प्रशिक्षणको लागि ‘हामी तपाईंकै लागि’ थिम अन्तर्गत सहयोग गर्दै आएको छ ।
मकालु खबर
