रेडक्रसद्वारा १२ सय ७३ परिवारलाई राहत वितरण, एक हजार बढी स्वयंसेवक परिचालन

काठमाडौं । नेपाल रेडक्रसले मनसुनजन्य विपद्बाट प्रभावित १ हजार २ सय ७३ परिवारलाई राहत सामग्री उपलब्ध गराएको जनाएको छ ।

असोज ११, १२ र १३ गते आएको अविरल वर्षापछि आएको बाढी, पहिरोबाट प्रभावित १ हजार २ सय ७३ परिवारलाई रेडक्रसले राहत सामग्री उपलब्ध गराएको जनाएको हो ।

पीडितलाई स्थानीय सरकारसँग मिलेर राहत र उद्धारको कामलाई अघि बढाएको जनाएको छ । जसमध्ये ४ सय ८२ परिवारलाई गैरखाद्य सामग्रीहरुको सेट उपलब्ध गराइएको रेडक्रसका विपद् व्यवस्थापन विभागका निर्देशक सागर श्रेष्ठले बताए ।

उनले सरकारले तोकेको विपद् संकटग्रस्त क्षेत्रमा स्थानीय सरकारसँग मिलेर पीडितलाई राहत र उद्धार गर्ने कामलाई अघि बढाइएको बताए । उनले सो क्षेत्रमा पीडितहरुको यकीन डाटा संकलन गर्न, उनीहरुलाई राहत र उद्धार गर्न कम्तीमा १ हजार स्वयंसेवक परिचालन गरिएको पनि बताए ।

टेलिफोन, विद्युत, सडक अवरुद्ध हुँदा पीडितको यकीन विवरण तयार गर्ने काममा पनि केही ढिलाई हुन गएको पनि रेडक्रशको स्पष्टिकरण छ ।

विपद् व्यवस्थापन विभागका निर्देशक श्रेष्ठले भने– ‘अहिले प्रभावित भएका जिल्लाहरुमा रिलिफ, रेसपोन्स र मलाई लाग्छ–मोर दयान १ थाउजेन्ट भोलेन्टियरस मोविलाईज हुनुहुन्छ । इन्फरमेशन ल्याउन, सर्टेन रेसक्यू गर्न र रिलिफ सर्पोटका लागि कामहरु भइरहेका छन् । त्यसमा हामीसँग इन्कन्ट्री पार्टनरहरु पनि सहयोगका लागि हुनुहुन्छ । र स्थानीय सरकारसँग मिलेर काम गरिराखेका छौं ।’

विभागका अनुसार यस वर्षको मनसुनबाट ६३ जिल्ला प्रभावित रहेका छन् । ती मध्ये पीडित ९४८ घर परिवारलाई १५ हजारका दरले आर्थिक सहायता प्रदान गरिएको पनि विभागका निर्देशक श्रेष्ठले बताए ।

यस वर्षको मनसुन शुरु भए यता ३८१ जनाको मृत्यु भएको, ३७५ जना घाइते भएका र ७३ जना हराइरहेको रेडक्रसको तथ्यांकमा उल्लेख गरिएको छ ।

रेडक्रसले यस वर्षको मनसुन यता ७८१ परिवारलाई गैरखाद्य सामग्री वितरण, १ हजार ४६ जना स्वयंसेवक परिचालन, २ हजार ८० वटा त्रिपाल वितरण, १ हजार ८५३ वटा कम्बल वितरण, म्याट्रेस ६ सय ६६,४४८ रोल डोरी वितरण गरेको जनाएको छ ।