काँग्रेससँग मिलेर जनमत गुमाएकालाई सबक सिकायौँ : शंकर पोखरेल

काठमाडौँ । सरकारको नेतृत्व गरिरहेको नेकपा (एमाले) का महासचिव शंकर पोखरेलले जनमत गुमाएको नेकपा (माओवादी केन्द्र) लाई सबक सिकाउन काँग्रेससँग सत्ता सहकार्य गर्नुपरेको बताएका छन् ।

महासचिव पोखरेलले २७५ सिटको संसदमा ३२ सिट ल्याउने माओवादी केन्द्रका अध्यक्ष पुष्पकमल दाहालले पूरै अवधि मुलुकको शासन गर्ने हुँकार गरेपछि दुई ठूला दल काँग्रेस–एमालेले त्यो सम्भव छैन भन्ने सन्देश दिनेगरी सत्ता सहकार्यलाई अघि बढाउनुपरेको बताएका हुन् ।

बुधवार पार्टी मुख्यालय च्यासलमा आयोजित नेकपा (एमाले) युवा विद्यार्थी विशेष जिल्ला कमिटीको पाँचौँ जिल्ला अधिवेशनको उद्घाटन सत्रमा बोल्दै उनले आगामी निर्वाचनमा पनि काँग्रेस–एमालेबीच सत्तापक्ष र प्रतिपक्षको भुमिका निर्वाह गर्नेगरी एकल चुनावी प्रतिस्पर्धा गरेर अघि बढने सहमति भएको बताए ।

जनमत गुमाउँदै गएको माओवादीले संसदमा ३२ सिटलाई म्याजिक नम्बर भनेपछि आफूहरूले सत्ता सहकार्य गरेर त्यसको जवाफ दिने अवस्था आएको महासचिव पोखरेलको भनाई थियो । महासचिव पोखरेलले मुलुकलाई राजनीतिक स्थायित्व दिनका लागि सरकारले संविधानमा परिमार्जन गर्न चाहेको पनि दोहोर्याए ।

उनले भने ‘अहिले हाम्रो पार्टीको अगुवाइमा नेपालका २ प्रमुख पार्टीहरू मिलेर मुलुकलाई अघि बढाउने संकल्प र अठोट गरेका छौ । र, हामीले भनेका छौं–स्थायित्वको आधार खोजी गर्नका लागि संविधानको रिभ्यु गर्नेछौँ । कानुनको पुनरावलोकन गर्नेछौँ । संरचनागत सुधार गर्नेछौँ । त्यसका माध्यमबाट मिसन २०८४ अर्थात २०८४ सालमा हुने चुनावमा प्रमुख पार्टीहरू कसैसँग गठबन्धन नगरी आफ्नो नीतिको जगमा जनताका बीचमा गएर बहुमत प्राप्त गर्न प्रयत्न गर्नेछौ भन्ने कुराको संकल्प र अठोट गरेका छौं । त्यस अर्थमा नेपालको राजनीतिमा अहिले एक प्रकारले भन्ने हो भने जनमत गुमाएकाहरूले शासन गर्ने जुन प्रकारको लोकतन्त्रको मजाकको विषय बनाइएको परिस्थिति छ । तपाईँहरूले पनि सुन्न भएको होला एक समय । २७५ सिट भएको संसदमा ३२ नम्बर त म्याजिक नम्बर । यही ३२ नम्बरले पाँच वर्ष नै शासन गर्छ भन्ने हुँकार पनि सुन्नु भयो । हो त्यो हुँकारलाई हामीले दुई वटा राजनीतिक दल मिलेर अव त्यो सम्भव छैन भन्ने कुराको सन्देश दिने प्रयत्न गरेका छौं । अव मुलुकको सत्तापक्ष र प्रमुख प्रतिपक्ष सबभन्दा ठूलो दलले शासन चलाउने र दोस्रो ठूलो दलले प्रतिपक्षको भूमिका खेल्न सक्ने आधार निर्माण गर्नेगरी मुलुकको राजनीतिलाई डोहो¥याउनु पर्दछ भन्ने मान्यताका आधारमा नेकपा एमाले र नेपाली काँग्रेस मिलेर अघि बढ्न खोजिराखेका छौं ।’

महासचिव पोखरेलले जनमत गुमाएकाहरूले शासन गर्ने काम लोकतन्त्रको मजाकको विषय भएकाले त्यसको अन्त्य आफूहरूको रहेको पनि बताए ।